Afg‘oniston va Pokiston o‘rtasida qurolli to‘nashuv holatlari ko‘paymoqda. Ikki davlat munosabatlaridagi siyosiy taranglik tobora kuchayib bormoqda.
TOLO News agentligining xabar qilishicha, Pokiston qurolli kuchlari yarim tunda Afg‘onistonning chegaradosh hududlari – Xost viloyatidagi Alisher tumaniga raketa zarbalari berdi. Afg‘oniston tomoni ham javob qaytargani bois, o‘zaro zarbalar almashuvi tonggi soat 5 gacha davom etgan.
Bunday to‘qnashuvlar natijasida ko‘plab oilalar o‘z uylarini tashlab qochishga majbur bo‘lmoqda. Qurbonlar va yaradorlar haqida hozircha aniq ma’lumotlar yo‘q.
Ta’kidlash joiz, o‘tgan yilning 24 dekabrida ham Pokiston harbiy samolyotlari Afg‘onistonning chegaradosh Paktika viloyatiga aviahujumlar uyushtirgan edi. Pokiston tomoni buni “pokistonlik toliblarning lagerlarini” nishonga olgani bilan izohlagan.
Afg‘oniston hukumati o‘z bayonotida bu zarbalar oqibatida kamida 46 nafar tinch aholi vakillari halok bo‘lgani, ularning aksariyati ayollar va bollar bo‘lganini iddao qilgan.
Afg‘oniston tomoni bu zarbalarga javob tariqasida 28 dekabr kuni Pokiston hududiga bostirib kirib, 19 nafar pokistonlik harbiyni o‘ldirishgan edi.
Qayd etish joiz, Pokiston va Afg‘oniston o‘rtasidagi chegara mustahkam emasligi bois, turli terrorchi guruhlar, shuningdek, tolibon jangarilari bemalol bu chegarani kesib-o‘tib yurishadi. Chegaraning ikki tomonida pushtunlar ko‘pligi va hukumatga to‘la bo‘ysunmasligi bois, bu hududlarda Pokiston hukumati va armiyasining ta’siri kuchsiz. Bunday omillar terrorchi va jangarilarga qarshi kurashni murakkablashtiradi.
Abdulloh Sayyid
