Dog‘iston Respublikasi poytaxti Maxachqal‘a shahrida kuchli yomg‘ir oqibatida suv toshqini uch qavatli turar joy binosining poydevori yuvilib, binoning qulashiga sabab bo‘ldi. Bu haqda “RIA Novosti” xabar berdi.
Shahar ma’muriyati yana to‘rtta binoda qulashi xavfi borligi va taxminan 300 kishi evakuatsiya qilinganini ma’lum qildi.
Hodisa binolar daryo yaqinida qurilgani tufayli sodir bo‘lgan.
Yomg‘ir respublikadagi boshqa hududlarda ham muammolarga sabab bo‘lib, 139 ta qishloq elektrsiz qoldi, 50 dan ortiq qishloqda transport harakati to‘xtatildi va 12 shaharlararo poezd qatnovi bekor qilindi.
Mahalliy hokimiyat organlari daryo o‘zanlarini tozalash uchun yuqori darajada tayyorgarlik ko‘rilganini xabar qilgan. Shuningdek, poytaxtda favqulodda holat e’lon qilindi.
