Афғонистон ва Покистон ўртасида қуролли тўнашув ҳолатлари кўпаймоқда. Икки давлат муносабатларидаги сиёсий таранглик тобора кучайиб бормоқда.
TOLO News агентлигининг хабар қилишича, Покистон қуролли кучлари ярим тунда Афғонистоннинг чегарадош ҳудудлари – Хост вилоятидаги Алишер туманига ракета зарбалари берди. Афғонистон томони ҳам жавоб қайтаргани боис, ўзаро зарбалар алмашуви тонгги соат 5 гача давом этган.
Бундай тўқнашувлар натижасида кўплаб оилалар ўз уйларини ташлаб қочишга мажбур бўлмоқда. Қурбонлар ва ярадорлар ҳақида ҳозирча аниқ маълумотлар йўқ.
Таъкидлаш жоиз, ўтган йилнинг 24 декабрида ҳам Покистон ҳарбий самолётлари Афғонистоннинг чегарадош Пактика вилоятига авиаҳужумлар уюштирган эди. Покистон томони буни “покистонлик толибларнинг лагерларини” нишонга олгани билан изоҳлаган.
Афғонистон ҳукумати ўз баёнотида бу зарбалар оқибатида камида 46 нафар тинч аҳоли вакиллари ҳалок бўлгани, уларнинг аксарияти аёллар ва боллар бўлганини иддао қилган.
Афғонистон томони бу зарбаларга жавоб тариқасида 28 декабр куни Покистон ҳудудига бостириб кириб, 19 нафар покистонлик ҳарбийни ўлдиришган эди.
Қайд этиш жоиз, Покистон ва Афғонистон ўртасидаги чегара мустаҳкам эмаслиги боис, турли террорчи гуруҳлар, шунингдек, толибон жангарилари бемалол бу чегарани кесиб-ўтиб юришади. Чегаранинг икки томонида пуштунлар кўплиги ва ҳукуматга тўла бўйсунмаслиги боис, бу ҳудудларда Покистон ҳукумати ва армиясининг таъсири кучсиз. Бундай омиллар террорчи ва жангариларга қарши курашни мураккаблаштиради.
Абдуллоҳ Саййид
