Jahonda sodir bo‘layotgan murakkab global jarayonlarni inobatga olgan holda Qurolli Kuchlarning qudrati, O‘zbekistonning mudofaa qobiliyati va harbiy salohiyatini yanada oshirish maqsad qilingan. Bu jamoatchilik muhokamasiga qo‘yilgan 2025 yilga mo‘ljallangan davlat dasturi loyihasida ko‘zda tutilgan.
Unga ko‘ra, “O‘zbekiston Respublikasi Mudofaa vazirligi bo‘linmalarini 2022—2026 yillar mobaynida zamonaviy qurol-aslaha, harbiy va maxsus texnika, boshqa zarur jihozlar va vositalar bilan ta’minlash, mavjud texnikalarni ta’mirlash va modernizatsiya qilish bo‘yicha kompleks dasturi”ning ijrosi yuzasidan 2025 yil uchun rejalashtirilgan tovar (ish, xizmat)larning xaridi amalga oshiriladi.
Mudofaa vazirligiga har yili ajratiladigan budjet mablag‘lari doirasida 2025—2026 yillarda Mudofaa vazirligi bo‘linmalarini zarur topogeodezik va geoaxborot dasturiy ta’minot vositalari va maxsus texnikalar bilan bosqichma-bosqich ta’minlash rejalashtirilmoqda. Soha mutaxassislarini zamonaviy geoaxborot va topogeodezik ta’minot bo‘yicha bilim va ko‘nikmalari oshirib boriladi.
Yerni masofadan zondlash materiallari (kosmosuratlar) yordamida elektron xaritalarini yaratish va yangilash ko‘zda tutilgan.
Umumta’lim tashkilotlarida chaqiruvga qadar boshlang‘ich tayyorgarlik fanini o‘quv-uslubiy va dasturiy jihatdan takomillashtirib borish, fan o‘qituvchilarining faoliyatini yanada qo‘llab-quvvatlash, shuningdek, belgilangan tartibda bosqichma-bosqich moddiy-texnik jihatdan ta’minlab borish ishlarini amalga oshirish belgilandi.
Loyihaga ko‘ra, Mudofaa vazirligi tizimi (markaziy apparat, harbiy okrug, birlashma, qo‘shilma, harbiy qism va muassasalar)da Yagona kadrlar axborot elektron platformasini yaratilib, ishga tushiriladi.
Istiqbolli komandir va boshliqlarni mahalliy (prezident huzuridagi Davlat boshqaruv akademiyasi, Jahon iqtisodiyoti va diplomatiya universiteti huzuridagi Diplomatik akademiya, Strategik tahlil va istiqbolni belgilash oliy maktabi va boshqalar) hamda xorijiy ta’lim va ilmiy-tadqiqot muassasalarida bosqichma-bosqich o‘qitish va malakasini oshirish yo‘lga qo‘yiladi.
Mudofaa vazirligi harbiy gospitallarini zamonaviy MSKT, MRT va ExoKG (VEM tizimi bilan) bilan belgilangan tartibda ta’minlash davom ettiriladi. Vazirlik harbiy gospitallari 6 dona reanimobil bilan bosqichma-bosqich ta’minlanadi. Ehtiyojdan kelib chiqqan holda, vazirlik qo‘shinlari sanitar avtomobillar bilan bosqichma-bosqich ta’minlanadi.
Vatanni himoya qilishda qahramonlarcha halok bo‘lgan o‘g‘lonlar hayoti va qahramonliklari haqida ko‘rsatuv va qisqa lavhalar tayyorlash hamda namoyish etish rejalashtirilgan.
