Rossiya Tergov qo‘mitasi buyuk rus adibi Mixail Lermontovning o‘ldirilishi bo‘yicha tergovni boshladi, deb ma’lum qildi "RIA Novosti" agentligiga Rossiya xalq artisti va Davlat dumasi deputati Nikolay Burlyayev.
"Tergov qo‘mitasi so‘rovimizga ijobiy javob berdi <…> tergovga jiddiy hamkorlikda tayyorgarlik boshlandi", degan deputat. Keyinroq Tergov qo‘mitasi bu ma’lumot haqiqatga to‘g‘ri kelmasligini ma’lum qildi.
Yanvar oyi oxirida Burlyayev Tergov qo‘mitasiga tegishli ariza bilan murojaat qilganini aytgan edi. Uning so‘zlariga ko‘ra, ko‘p yillar davomida Lermontov olimlari, sud-tibbiyot, ballistika va tibbiyot sohalaridagi mutaxassislar 1841 yilda Lermontov o‘ldirilganidan keyin darhol o‘tkazilgan tergovning adolatsiz va noxolis kechgani haqida bayonot berishdi.
Ma’lumot uchun, Mixail Lermontov 1814 yilda tug‘ilgan. U 1841 yil 27 iyulda (eski taqvim bo‘yicha 15 iyulda) Mashuk tog‘i etagida bo‘lib o‘tgan duelda, 26 yoshida vafot etgan. Adib Pyatigorsk shahrida 25 yoshli iste’fodagi mayor Nikolay Martinov bilan urushib qolgan. Duelda ular to‘pponchadan otishgan. Lermontov havoga o‘q uzgan. Martinov shoirning ko‘ksini mo‘ljallab otib, o‘ldirgan.
Bu Lermontovning ikkinchi dueli bo‘lgan. Bir yil avval, 1840 yilda ham adib tantanali bal - raqs marosimida Fransiya elchisining o‘g‘li bilan urishib qolib, duelga chiqishgan. Otishmada ikkovi ham tirik qolgan.
Yozuvchi, shoir, rassom va harbiy zobit Mixail Lermontov Rossiya imperiyasining Kavkazdagi istilochilik urushlarida qatnashgan. “Zamonamiz qahramoni”, “Bela”, “Qochoq”, “Mtsiri” va “Borodino” kabi adabiy asarlari bilan mashhur.
Abdulloh Sayyid
