Davlat tibbiyot muassasalariga ishga qabul qilishning yangi elektron mexanizmi yaratildi. Bu haqida SSV Axborot xizmati xabar bermoqda.
Korrupsiya — davlat va jamiyat uchun jiddiy xavf. Shu bois yurtimizda barcha sohalarda, xususan, sog‘liqni saqlash tizimida bu illatga qarshi keskin va murosasiz kurashish, turli byurokratik hamda inson omili bilan bog‘liq to‘siqlarga barham berishga qaratilgan qator chora-tadbirlar amalga oshirilyapti.
— Xususan, ayni paytda vazirlik qoshida manfaatlar to‘qnashuvi va korrupsiya holatlari bo‘yicha tezkor xabar berish, bu boradagi kamchiliklarning o‘z vaqtida oldini olish va ularni bartaraf etish maqsadida 71 241-10-65 yoki respublika bo‘yicha yagona 1203 raqamli “Ishonch telefoni” faoliyat yuritmoqda, — deydi Korrupsiyani oldini olish va kurashish bo‘limi yetakchi mutaxassisi Azizbek Shukurov.
Sohada budjet qonunchiligi buzilishi, korrupsiyaviy xatti-harakatlar va moliyaviy kamchiliklarga yo‘l qo‘yilishining oldini olish maqsadida vazirlik qoshida Situatsion markaz tashkil etildi.
Tibbiyot muassasalarida amalga oshirilayotgan har bir moliyaviy operatsiyani kuzatib borish va nazorat qilish imkonini beruvchi ushbu markaz “xarid.uzex.uz”, “xt-xarid.uz”, “Shaffof qurilish”, “UzASBO”, “DMBAT”, “registr.stat.uz” hamda boshqa axborot tizimlari va Hisob palatasining elektron ma’lumotlar bazasi asosida faoliyat olib boradi.
Shuningdek, davlat tibbiyot muassasalariga yuqori malakali kadrlarni ishga qabul qilishning yangi elektron mexanizmi yaratilib, o‘tgan yil noyabr oyidan Buxoro viloyatida sinov tariqasida yo‘lga qo‘yildi.
Mazkur yangi tizim o‘zini amalda oqlagani bois 2025 yil mart oyidan respublika miqyosida to‘liq joriy etilishi rejalashtirilgan.
