Tramp ma’muriyati «qizil» ro‘yxatdagi mamlakatlar fuqarolariga AQSHga kirishni taqiqlashni rejalashtirmoqda. Ushbu ro‘yxatga Kuba, Eron, Liviya, Shimoliy Koreya, Somali, Sudan, Suriya, Venesuela va Yaman kiritilgan. Ta’kidlanishicha, yuqoridagi davlatlardan kelgan shaxslarga Trampning birinchi prezidentlik muddati (2017-2021) davomida ham AQSHga kirish taqiqlangan edi. Bu safar ushbu ro‘yxatga Afg‘oniston ham qo‘shilishi mumkin.
«Qizil» ro‘yxatdan tashqari, “zarg‘aldoq” ro‘yxat ham joriy etiladi. Ushbu ro‘yxatdagi mamlakat fuqarolari AQSHga cheklangan turdagi vizalar orqali va qisqa muddatli mehmon sifatida kirish imkoniyatiga ega bo‘ladi.
«Sariq» ro‘yxatga kiritilgan davlatlarga esa 60 kun ichida vaziyatni tuzatish imkoniyati beriladi. Ular AQSH talablarini, jumladan, pasport berish qoidalari va sayyohlar haqidagi ma’lumotlarni taqdim etish bo‘yicha talablarni bajarishlari kerak bo‘ladi. Aks holda, ular «qizil» yoki «zarg‘aldoq» ro‘yxatga kiritiladi.
Tramp o‘zining prezidentlik lavozimidagi eng birinchi ish kuni - 20 yanvarda AQSH Davlat departamentiga, «tekshirish va skrining bo‘yicha ma’lumotlari o‘ta ishonchsiz bo‘lgan davlatlarni aniqlash»ni topshirdi. Bunday davlatlarning fuqarolariga kirish qisman yoki to‘liq to‘xtatilishi mumkin. Ushbu ro‘yxat taxminan ikki hafta ichida tayyor qilinishi kutilmoqda.
Abdulloh Sayyid
