AQShdagi “AI Futures Project” tashkiloti olimlari yaqin yillarda sun’iy intellekt qanday rivojlanishini taxmin qilishga harakat qildi.
Ularning “AI 2027” deb nomlangan tahliliy ishida keltirilishicha, bir necha yil ichida ishlab chiquvchilar umumiy sun’iy intellekt (AGI) yaratish darajasiga yetib borishi mumkin. Bu esa — sun’iy intellekt nafaqat muayyan vazifalarni bajarishi, balki insondek mustaqil fikrlay olishi demakdir.
Eng xavotirli ssenariyga ko‘ra, 2030-yilga kelib “AGI” o‘z imkoniyatlarini yanada kengaytiradi va “superintellekt”ga aylanadi. Bu sun’iy aql eng zukko insonlardan ham ustun bo‘ladi.
Tadqiqotchilarning fikricha, agar bunday sun’iy intellektga vaqtida cheklovlar o‘rnatilmasa, u insoniyatni tahdid sifatida ko‘rib, yo‘q qilishga harakat qilishi mumkin.
“AI Futures Project” bu borada jiddiy xavflarni tilga olgan bo‘lsa-da, “Meduza” nashri mazkur tahlil asosida ushbu ssenariyning real ehtimolini o‘rganib chiqdi.
Mutaxassislar bu prognozlarni “ilmiy fantastikaga yaqin, biroq inkor qilib bo‘lmaydigan ehtimol” deb baholamoqda. Hozircha AGI hali mavjud emas, biroq bu sohadagi sur’at juda tez bo‘lgani uchun, xavfsizlik choralarini bugundan ko‘rib chiqish lozimligi ta’kidlanmoqda.
Hozircha insoniyatga to‘g‘ridan-to‘g‘ri xavf yo‘q, biroq kelajakdagi ehtimoliy tahdidlar inobatga olinmasa, 2030-yilgi fojiaviy ssenariy haqiqatga aylanishi mumkin. Shu sababli, sun’iy intellekt rivojiga doir nazorat va tartibga solish choralari dolzarb masalaga aylanmoqda.
