SSV Matbuot xizmatining shu kabi savollariga tibbiyot fanlari doktori, professor Nizom Ermatov javob berdi.
Allergiyaga sabab bo‘lishi mumkin — Qulupnay iste’molida ehtiyot bo‘ling!
Mutaxassisning qayd etishicha, qulupnay mevalar ichida oziqaviy va biologik qiymati yuqori, vitamin va minerallarga boy bo‘lgan, bahor va yoz fasllarida keng iste’mol qilinadigan ne’matlardan biri hisoblanadi. Biroq bu mevani yetishtirish va iste’mol qilish jarayonida bir qator gigiyenik va salomatlik masalalariga jiddiy e’tibor qaratish zarur.
Ma’lum qilinishicha, qulupnay ba’zan zararli pestitsidlar yordamida yetishtiriladi, ularning ayrim qoldiq moddalari mevaning yuzasida saqlanib qolishi mumkin. Xususan, tuproq gigiyenik talablarga javob bermasa, qulupnay orqali turli parazitlar, shu jumladan gijja qurti tuxumlari inson organizmiga tushishi ehtimoli mavjud.
Shu bois, qulupnayni iste’mol qilishdan avval uning yashil bargli qismini olib tashlash va mevani tozalab, yaxshilab yuvish tavsiya etiladi. Tibbiyot mutaxassislari qulupnayni tuzli yoki sodali suv bilan yuvmaslikni, bu usullar mevaning tashqi yupqa qavatini shikastlab, uning oziqaviy qiymatini pasaytirishini ta’kidlashmoqda.
Qulupnay tarkibida C vitamini (askorbin kislota), folat (folyo kislota), magniy, marganes, selen va ayrim hollarda temir va yod kabi minerallar mavjud. Ammo shunga qaramasdan, ortiqcha va nazoratsiz iste’mol qilinganda qulupnay allergik reaksiyalarni keltirib chiqarishi mumkin. Bu ayniqsa bolalar, allergiyaga moyil insonlar uchun xavfli hisoblanadi.
Shuningdek, dehqonlarimizga qulupnay terimini ertalab amalga oshirish va mevani tezkorlik bilan to‘g‘ri sharoitda saqlash tavsiya etiladi. Chunki kechqurun terilgan va noto‘g‘ri saqlangan qulupnay tezda buzilishi mumkin.
Mutaxassis aholini qulupnay mevasini ehtiyotkorlik bilan tanlab, yuvish va iste’mol qilishga chaqirmoqda.
