Rossiyaliklar Checheniston rahbari Ramzan Qodirovning iste’foga chiqish haqidagi so‘zlarini noto‘g‘ri tushunishgan. Bu haqda Qodirovning shaxsan o‘zining Telegram-kanalida ma’lum qildi.
Ma’lumki bugun, 6 may kuni Ramzan Qodirovning iste’foga chiqishni so‘ragani haqidagi bayonoti ommaviy axborot vositalarida tarqalgan edi.
Qodirovning so‘zlariga ko‘ra, u Checheniston rahbari lavozimida qolish yoki ketishni shaxsan o‘zi hal qilmaydi. Shu bilan birga, u federal markazga iste’fo haqida murojaat qilganini rad etmadi.
«Ha, men bunday iltimos yoki taklif bilan chiqishim mumkin. Ammo men qanchalik so‘ramay, qanchalik gapirmay, bunday qarorni yagona inson — Vladimir Vladimirovich Putin qabul qiladi», — deb yozdi Checheniston rahbari o‘z blogida.
Bundan avval siyosatshunos Stanislav Tarasov «Lenta.ru» nashri bilan suhbatda Qodirovning ehtimoliy vorislari haqida fikr bildirgan edi.
Uning ta’kidlashicha, bu haqda gapirish hozircha mushkul, ammo ular orasida "Ahmat" maxsus guruhi qo‘mondoni, Rossiya Mudofaa vazirligining bosh harbiy-siyosiy boshqarmasi bosh muovini general-leytenant Apti Alaudinov yoki Qodirovning o‘g‘illaridan biri bo‘lishi mumkin.
Abdulloh Sayyid
