O‘zbekistonga pul o‘tkazmalari keskin oshdi: 2025 yilning birinchi choragida 3,3 mlrd dollar jo‘natilgan.
2025 yilning yanvar–mart oylari davomida O‘zbekistonga xorijdan amalga oshirilgan pul o‘tkazmalari hajmi 3,3 milliard AQSH dollarini tashkil etdi. Bu ko‘rsatkich o‘tgan yilning mos davriga (2024 yilning birinchi choragida — $2,5 mlrd) nisbatan 32 foizga ko‘pdir.
Markaziy bankning pul-kredit siyosatiga oid sharhida shu haqda ma’lum qilingan.
Markaziy bank ma’lumotlariga ko‘ra, ushbu o‘sish ikki asosiy omil - mehnat migrantlari oqimining oshgani va asosiy hamkor davlatlar (xususan, Rossiya) valyutalarining mustahkamlanishi bilan bog‘liq.
Jumladan, yanvar va fevral oylarida mamlakatga har biri qariyb 1 milliard dollarlik pul o‘tkazmalari amalga oshirilgan bo‘lsa, mart oyida bu ko‘rsatkich 1,2 milliard dollarga yetgan — bu shu paytgacha kuzatilgan eng yuqori oylik natijalardan biridir.
Markaziy bankning ta’kidlashicha, mehnat migrantlari yuborgan mablag‘lar mamlakat valyuta tushumlari va ichki iste’mol darajasiga jiddiy ta’sir ko‘rsatmoqda. Shuningdek, ishchi migrantlar ko‘p bo‘lgan davlatlarda ish haqi darajasi oshgani va ulardagi mehnat bozorida ishchi kuchiga talab o‘sgani pul o‘tkazmalari o‘sishiga xizmat qilmoqda.
Ushbu holat tufayli, Markaziy bank 2025 yil uchun pul o‘tkazmalari bo‘yicha yillik o‘sish prognoziga o‘zgartish kiritdi: avvalgi 10–12 foiz o‘rniga, endilikda 15–18 foiz atrofida o‘sish kutilmoqda.
Shu bilan birga, kelgusidagi xavflar ham inkor etilmayapti — global iqtisodiy o‘sish sur’atlarining sekinlashishi va hamkor mamlakatlardagi valyuta kurslarining o‘zgaruvchanligi pul o‘tkazmalari dinamikasiga salbiy ta’sir ko‘rsatishi mumkin.
Eslatib o‘tamiz, 2024 yil yakunlari bo‘yicha O‘zbekistonga yuborilgan pul o‘tkazmalari hajmi 14,8 milliard dollarni tashkil etgan bo‘lib, bu 2023 yilga nisbatan 30 foizga yoki 3,4 milliard dollarga ko‘p bo‘lgan edi.
Abdulloh Sayyid
