10 iyun kuni “Bunyodkor” stadionida O‘zbekiston milliy jamoasining tarixiy g‘alabasi munosib nishonlandi. Millat birlashgan kun yana xotirlandi.
Toshkentdagi “Bunyodkor” stadionida Qatarga qarshi o‘tkazilgan o‘yin – nafaqat sport, balki umummilliy bayramga aylandi. Ushbu uchrashuv O‘zbekiston futboli tarixidagi muhim burilishlardan biri bo‘ldi.
Stadion to‘lib-toshdi – 33 mingga yaqin muxlis milliy jamoaning kurashini jonli tomosha qildi. O‘yinga qiziqish shunchalik katta ediki, odamlar stadionga sig‘may qolishidan xavotirda edi.
Garchi turnir nuqtayi nazaridan bu bahsda Qatarning motivatsiyasi yuqori bo‘lsa-da, “Oq bo‘rilar” muxlislar uchun jonbozlik ko‘rsatishdi. Aziz Turg‘unboyevning mahoratli goli uchrashuvdagi burilish nuqtasiga aylandi — u raqib himoyachilarini aldab, yuqori burchakka zarba yo‘llab hisobni ochdi.
Bu gol nafaqat o‘yin taqdirini, balki muxlislarning kayfiyatini ham belgilab berdi. Shiddatli vaziyatlarga qaramay, jamoa bardosh ko‘rsatib, mundialga yo‘llanma olgan kunni yodga tushirdi.
Fotograf: Islom Ro‘ziyov
