10 июнь куни “Бунёдкор” стадионида Ўзбекистон миллий жамоасининг тарихий ғалабаси муносиб нишонланди. Миллат бирлашган кун яна хотирланди.
Тошкентдаги “Бунёдкор” стадионида Қатарга қарши ўтказилган ўйин – нафақат спорт, балки умуммиллий байрамга айланди. Ушбу учрашув Ўзбекистон футболи тарихидаги муҳим бурилишлардан бири бўлди.
Стадион тўлиб-тошди – 33 мингга яқин мухлис миллий жамоанинг курашини жонли томоша қилди. Ўйинга қизиқиш шунчалик катта эдики, одамлар стадионга сиғмай қолишидан хавотирда эди.
Гарчи турнир нуқтаи назаридан бу баҳсда Қатарнинг мотивацияси юқори бўлса-да, “Оқ бўрилар” мухлислар учун жонбозлик кўрсатишди. Азиз Турғунбоевнинг маҳоратли голи учрашувдаги бурилиш нуқтасига айланди — у рақиб ҳимоячиларини алдаб, юқори бурчакка зарба йўллаб ҳисобни очди.
Бу гол нафақат ўйин тақдирини, балки мухлисларнинг кайфиятини ҳам белгилаб берди. Шиддатли вазиятларга қарамай, жамоа бардош кўрсатиб, мундиалга йўлланма олган кунни йодга туширди.
Fotograf: Islom Ro‘ziyov
