DXXning Xorazm viloyati bo‘yicha boshqarmasi xodimlari tomonidan tezkor tadbir o‘tkazildi.
Tezkor tadbirda Surxondaryo viloyatining Sherobod tumanida yashovchi fuqaro 49 kg 599 gr "opiy" moddasini o‘zining boshqaruvida bo‘lgan DAF rusumli yuk avtomashinasining yukxonasidagi xufiyona joyga yashirgan holda Qoraqalpog‘istonning To‘rtko‘l tumaniga olib kelgan vaqtida ashyoviy dalillar bilan ushlandi.
Tergovga qadar, tekshiruv davomida Tojikistondan kontrabanda yo‘li bilan olib kelingan mazkur giyohvandlik vositasi kelgusida Xorazm viloyati hududida sotilishi rejalashtirilganligi ma’lum bo‘ldi.
Holat yuzasidan mazkur shaxsga nisbatan JKning 28,246-moddasining 2-qismi va 273-moddasining 5-qismi bilan jinoyat ishi qo‘zg‘atilib, qamoq ehtiyot chorasi qo‘llanildi.
Shuningdek, tergov harakatlari doirasida uning jinoiy sheriklarini aniqlash bo‘yicha ham zarur chora-tadbirlar amalga oshirilmoqda.
