Toshkent xalqaro aeroportida 31, 23 va 18 yoshli qizlarni Tailandga fohishalik uchun yuborayotgan 53 yoshli ayol qo‘lga tushdi. Bu haqda Samarqand viloyati Ichki ishlar boshqarmasi xabar berdi.
Qayd etilishicha, Toshkent shahrida yashovchi ayol jinoiy guruh tuzib, moddiy jihatdan qiynalgan qizlarni mo‘may daromad topishga ishontirgan. U qizlarni fohishalik va qo‘shmachilik qilish uchun Tailandga jo‘natib, ulardan foydalangan holda shahvoniy ekspluatatsiya qilishni rejalashtirayotgani haqida tezkor ma’lumot olingan.
Samarqand viloyati Ichki ishlar boshqarmasi, Davlat xavfsizlik xizmati xodimlari tomonidan Islom Karimov nomidagi Toshkent xalqaro aeroporti hududida o‘tkazilgan tezkor-qidiruv tadbirlari natijasida 53 yoshli ayol 3 nafar – 31, 23 va 18 yoshli qizlarni Tailandga jo‘natmoqchi bo‘lgan vaqtida ashyoviy dalillar bilan ushlangan. Ayolning Tailanddagi 53 yoshli tanishi qizlarni kutib olib, ish bilan ta’minlashi evaziga 5 ming AQSH dollari yuborishi va 3 oy mobaynida fohishalik qilib, pul ishlab berishi sharti bilan kelishib olingani ma’lum bo‘lgan.
Bildirilishicha, mazkur holat yuzasidan Jinoyat kodeksining 135-moddasi bilan jinoyat ishi qo‘zg‘atilib, gumonlanuvchi protsessual tartibda qamoqqa olingan.
