Turkiyaning bir necha viloyatida yuqori harorat va kuchli shamol ortidan o‘rmon yong‘inlari avj oldi. Ayniqsa, Izmir, Manisa, Mugla, Adana, Hatay, Aydin va boshqa hududlarda yong‘inlar bir vaqtning o‘zida bir necha nuqtada kuzatildi.
Izmirning Menderes va Seferixisar tumanlarida yong‘inlar 12 kilometrgacha maydonda tarqaldi. Hatto yozgi dam olish maskanlari, xonadonlar va avtotransport vositalari ham zarar ko‘rgan. 10 ta mahalla xavf ostida qolgan.
Manisaning Aqhisor tumanida yong‘in 3 kundan beri davom etmoqda. 3 ta samolyot, 5 ta vertolyot, 85 ta o‘t o‘chiruvchi mashina va yuzlab ishchi jalb qilingan.
Hatayning Antaqiya tumanidagi Qaraali mahallasidan alanga ko‘tarilgan. Yolqinlar aholi yashash hududlariga yaqinlashgan. Havo va yer orqali kurash olib borilmoqda.
Ayrim hududlarda — Antaliya, Mardin, Osmaniye, Aydin va Mersinda yong‘inlar nazoratga olingan. Ammo boshqa nuqtalarda xavf hamon saqlanib turibdi.
Turkiya xalqi kuchli shamol va 40 darajaga yaqin issiqda yong‘inlar bilan yakkama-yakka kurashayotgan bir paytda, savol ochiq qolmoqda: shunday favqulodda holatlarga qarshi tayyorgarlik darajasi yetarlimi?
Yo‘qolganlar bormi? Qurbonlar soni aniqmi? Yangi yong‘inlar qancha hududga tahdid solmoqda?
Ko‘zlar osmonda uchayotgan samolyotlarda, umidlar suv sepayotgan odamlarda. Ammo Turkiyaning nafas yo‘llari — o‘rmonlar — olovda.
