Jahon neft zaxiralari Eron atrofidagi mojarolar ta'sirida keskin qisqarib, rekord darajaga yetdi. Bu haqda Zamon.uz ma'lum qildi.
Tahlilchilarning hisob-kitoblariga ko'ra, aprel oyida neft zaxiralari sutkasiga 6,6 mln barreldan, umumiy hisobda esa oy davomida 200 mln barreldan kamaygan. Bu holat talab pasayganiga qaramay kuzatilgan. Qayd etilishicha, shu davrda neftga bo'lgan talab ham sutkasiga 5 mln barreldan tushib ketgan bo'lib, bu kuzatuvlar tarixidagi ikkinchi eng katta pasayish hisoblanadi. Bundan oldin bunday keskin pasayish faqat COVID-19 pandemiyasi davrida kuzatilgan.
Goldman Sachs ekspertlari ma'lum qilishicha, jahon neft zaxiralari so'nggi sakkiz yildagi eng past darajaga yaqinlashmoqda. Shuningdek, Arg agentligi ma'lumotlariga ko'ra, Shimoliy Yevropada aviatsiya yoqilg'isi zaxiralari aprel oyida so'nggi olti yillik minimumga tushgan.
Financial Times yozishicha, AQShda benzin zaxiralari ta'til mavsumi davrida tarixiy past darajaga yetishi mumkin.
Tahlilchilar ta'kidlashicha, Yaqin Sharqdagi urush va Hormuz bo'g'ozi atrofidagi blokada tufayli neft bozoriga allaqachon 1 mlrd barreldan yaqin neft yetkazib berilmay qolgan. Mutaxassislar fikricha, neft bozorida vaziyat juda tez yomonlashyapti va yaqin bir necha hafta ichida jiddiy, xavfli bosqichga yetishi mumkin.
S&P Global Energy vakili Jim Burkhard so'zlariga ko'ra, bozor hali zaxiralarning rekord sur'atlarda qisqarayotganiga to'liq javob bermagan, shuning uchun neft narxlarining o'sishi hali oldinda.
