Uning aytishicha, eng ko‘p holat Toshkent shahrida qayd etilgan bo‘lib, 29 nafar haydovchi 12 jarima ballini “to‘plagan”.
Shuningdek:
— Farg‘ona viloyatida — 8 ta; — Buxoro viloyatida — 3 ta holat aniqlangan.
Bundan tashqari, Toshkent va Andijon viloyatlarida 2 tadan, Qoraqalpog‘iston Respublikasi, Samarqand, Namangan, Surxondaryo hamda Xorazm viloyatlarida 1 tadan holat qayd etilgan.
Navoiy, Qashqadaryo, Jizzax va Sirdaryo viloyatlarida esa hozircha 12 jarima balli haydovchilar aniqlanmagan.
Ma’lum qilinishicha, mazkur 49 ta holatning barchasi sudga yuborilgan.
Zoyir Yo‘ldoshevning ta’kidlashicha, haydovchilik huquqidan mahrum etilgan fuqarolar qayta imtihon topshirishi va avtomaktablarda o‘qishi talab etiladi. Shuningdek, nazariy imtihon tartibi ham kuchaytirilgan.
Endilikda haydovchilar avvalgidek 20 ta savoldan 18 tasiga emas, balki 50 ta savoldan kamida 46 tasiga to‘g‘ri javob berishi lozim.
Eslatib o‘tamiz, avvalroq O‘zbekistonda jarima ballari tizimi doirasida 12 balldan oshgan birinchi holat qayd etilgani xabar qilingandi.
Ma’lumot uchun, 2025 yil 1 iyundan boshlab YPH xodimlari tomonidan rasmiylashtirilgan bayonnomalar asosida jarima ballari hisoblanadi.
Shuningdek, 1 apreldan avtomatik kameralar orqali aniqlanadigan ayrim qoidabuzarliklar — svetoforning taqiqlovchi ishorasiga bo‘ysunmaslik, to‘xtash va to‘xtab turish qoidalarini buzish, qarama-qarshi yo‘lakka chiqish hamda tezlik me’yoriga amal qilmaslik holatlari uchun ham jarima ballari qo‘llanmoqda.
