Yamandagi husiylar Saudiya Arabistonining janubida joylashgan Najron viloyatiga hujum uyushtirdi. Hujum oqibatida 11 nafar tinch aholi jarohat oldi. Shu bilan birga, Ar-Riyod husiylar va Eron qo‘llab-quvvatlaydigan Iroqdagi qurolli guruhlar tomonidan mamlakat hududiga qarshi yangi muvofiqlashtirilgan hujumlar tayyorlanayotgani haqida ogohlantirdi.
Bu haqda Saudiya boshchiligidagi harbiy koalitsiyaning rasmiy vakili, general-mayor Turki al-Malikiy ma’lum qildi.
Uning so‘zlariga ko‘ra, Najron viloyatiga berilgan zarba oqibatida 7 nafar Saudiya fuqarosi, 1 nafar Yaman, 2 nafar Misr va 1 nafar Pokiston fuqarosi jarohatlangan. Jabrlanganlar orasida 4 yoshli bola ham bo‘lib, u ikkinchi darajali kuyish jarohatini olgan.
Turki al-Malikiy husiylarni xalqaro gumanitar huquq me’yorlarini qo‘pol ravishda buzgan holda fuqarolik obyektlarini nishonga olishda aybladi. Uning ta’kidlashicha, koalitsiya kuchlari tinch aholi xavfsizligini ta’minlash uchun barcha zarur choralarni ko‘radi.
Hozircha husiylar hamda Eron rasmiylari mazkur bayonot yuzasidan munosabat bildirgani yo‘q.
Ma’lum qilinishicha, AQSh va Isroilning Eronga qarshi besh oydan buyon davom etayotgan harbiy harakatlari mintaqadagi xavfsizlik vaziyatini yanada keskinlashtirgan. Shu munosabat bilan Saudiya, AQSh va boshqa Yaqin Sharq davlatlari razvedka xizmatlari husiylar hamda Eron Islom inqilobi qo‘riqchilari korpusi qo‘llab-quvvatlaydigan Iroqdagi qurolli guruhlar yaqin kunlarda Saudiyaning energetika infratuzilmasi, portlari va aeroportlariga qarshi muvofiqlashtirilgan hujumlar uyushtirishi mumkinligini aniqlagan.
Shu bois Ar-Riyod mintaqaviy xavfsizlik bo‘yicha hamkorlikni kuchaytirishga kirishdi. Manbalarga ko‘ra, bugun, 7 avgust kuni Saudiya Arabistoni, Turkiya va Pokiston o‘rtasida mudofaa sohasida hamkorlik to‘g‘risidagi kelishuv imzolanishi kutilmoqda.
Saudiyaning yuqori lavozimli rasmiylaridan biri mamlakat Eron bilan qarama-qarshilikni muzokaralar orqali hal etish va keskinlikni pasaytirish siyosatini qo‘llab-quvvatlayotganini aytdi. Uning fikricha, ehtimoliy hujumlar diplomatik jarayonni izdan chiqarishga qaratilgan bo‘lishi mumkin.
Ma’lumot o‘rnida, husiylar 4 avgust kuni Najron aeroportiga qilingan hujum uchun javobgarlikni o‘z zimmasiga olgan edi. 5 avgust kuni esa ular Marib va Hadramavt viloyatlarida Saudiya qo‘llab-quvvatlaydigan kuchlarga qarshi amalga oshirilgan hujumlarda Yaman hukumat qo‘shinlarining 30 nafardan ortiq harbiysi halok bo‘lganini da’vo qildi.
Eslatib o‘tamiz, 29 iyul kuni Saudiya Arabistoni AQSh Markaziy qo‘mondonligi bilan hamkorlikda Iroqdagi Eron qo‘llab-quvvatlaydigan qurolli tuzilmalarga zarbalar berganini ma’lum qilgan edi. Bu qaror Saudiya neft infratuzilmasiga dronlar orqali amalga oshirilgan hujumlardan so‘ng qabul qilingan. Iroqdagi mazkur qurolli guruhlar esa ushbu zarbalarga javob qaytarishini bildirgan.
