​Xotirjamlikni saqlashning 7 usuli

Bezovtalik — hayotimizning ajralmas qismi. U bilan kuniga necha marta to`qnash kelishingizga hech ahamiyat berganmisiz? E`tibor berib ko`ring va bezovtalik hissi bilan qanchalik ko`p duch kelishingizga o`zingiz amin bo`lasiz. Xo`sh, turfa murakkab vaziyatlarda dadillikni qanday qaytarish mumkin?

1. «Doktor, voy, jonim…»

Aytaylik, tishlaringiz salomatligiga ishonch hosil qilish uchun stomatolog qabuliga bordingiz. Navbat kutib o`tirib, ichkaridagi baqir-chaqiru dahshatli asbobning g`irillashi asabni egovlaydi. Lekin bunisi holva… Agar tish zirqirab og`rib turganda navbat kutishga to`g`ri kelsa-chi?! Bunday paytda xotirjam bo`lishning umuman iloji yo`q.

Tez yordam. Agar stomatolog xonasi yonida Yana bir o`zingizga o`xshagan «jabrdiyda» o`tirgan bo`lsa, uni gapga tutishga harakat qiling. O`zingiz ham chalg`iysiz, yurak hovuchlab o`tirgan sherigingizning ham dardini engillashtirasiz.

2. Birinchi uchrashuv

Oldinda ilk uchrashuv! Hayajondan qo`lingizdan hamma narsa tushib ketayapti, soch turmagingiz ko`nglingizdagidek chiqmayapti, pardozniku aytmasa ham bo`ladi! Xullas, xotirjamlik umuman unut bo`lgan. Xayolda faqat bir o`y: hammasini ertaga qoldisammikan?

Tez yordam. Agar har gall «ertaga keling» deyaversangiz, yolg`iz qolib ketishingiz aniq. Shuning uchun bugungi ishni ertaga qoldirmang! Uchrashuv oldidan makiyaj va turmagingizni butkul o`zgartirishga urinmang. Vaqt kamligida hammasi o`ylaganingizdek bo`lib chiqmasa, oldingi holingizga qaytishga fursat bo`lmaydi. Xullas, «eksperiment»lar qilmang. Yaxshisi, nimalar haqida gapirishingizni o`ylab ko`ring. Mazmunli gaplaringiz bilan uni lol qoldiring.

3. Ayol mashina boshqarsa…

Yo`lda ketayotib, yoningizda ketayotgan avtomobil egasi goh qo`l silkitib, goh quvlashmachoq o`ynashni taklif qilsa yoki mashinangizni turtib yuborsa, o`z-o`zidan sizga baqira ketsa... Xullas, avtomobil boshqarayotgan xonim yo`lda har qanday vaziyatlarga duch kelishi mumkin. Bunday paytda xotirjamlikni saqlash uchun asablar temirdan bo`lishi kerak.

Tez yordam. Eng yaxshi maslahat — «axmoqqa yo`l bering!» degan qoida. Yo`l tirbandligida avtomobilingiz uzoq vaqt turib qolsa, oynalarni yopib, sokin musiqa tinglang. Garchi shoshilayotgan bo`lsangiz ham mashinalar tiqilinchidan chiqib ketishga asabiylashish yordam bermaydi.

4. Juda muhim uchrashuv

Aytaylik, Yangi ish topdingiz. O`zingiz haqingizdagi ma`lumotnomani topshirib qo`yganingizga ancha vaqt bo`lgan va nihoyat ish beruvchi sizni suhbatga taklif etdi. Kechasi bilan sohangizga doir ma`lumotlaru yangiliklarni o`rgani chiqdingiz. Ertalab esa bu ma`lumotlardan asar ham qolmagan, ammo kam uxlaganingiz tufayli ko`zlaringiz ostidagi qoramtir shishlar aniq-ravshan ko`rinib turibdi. Ayol kishi bunday vaziyatda asabiylashmay tura oladimi?

Tez yordam. Muhim kelishuvlardan oldingi kuni yaxshilab dam oling. Uchrashuv oldidan esa hayajonni engishning bir oson yo`li bor: chuqur nafas olib, sekin chiqaring. Shu tarzda o`n marta takrorlasangiz, hayajoningiz ancha bosiladi.

5. So`z jangi

Bu vaziyatda o`zingizning haqligingizni bilib turasiz-u, buni isbotlab berolmasangiz, asabiylashgandan hatto ovozingiz qaltiray boshlaydi. Qochib ketgingiz va to`yib yig`lagingiz keladi.

Tez yordam. Asablarni asrash va xotirjam bo`lish uchun sukut yo`lini tanlang-da, «raqib»ingizga razm soling. Ko`pincha birgina nigoh qancha so`zlarning o`rnini bosadi. Agar jim turish qo`lingizdan kelmasa, bahsni keyinroqqa qoldirishni so`rang. Vaqt o`tib, asablar biroz «sovigach», bu bahs davom etmasligi ham mumkin.

6. Xuddi Siserondek…

Tasavvur qiling, siz konferensiya zalidasiz. Hademay chiqish qilish navbati sizga etadi. Hammaning nigohi sizda va bu vaziyatda tomog`ingizga nimadir tiqilganday bo`ladi. «Qaniydi buyuk notiq Siseronday bo`lib qolsam va hammani o`z nuqtim bilan lol qoldirsam», deb orzu qilasiz. Bunday hayajonli damlarda xotirjamlikni saqlash xayolga ham kelmaydi.

Tez yordam. Muhim uchrashuv oldidan ertalab sevimli qo`shig`ingizni kuylang. Ijroda o`zingizni qo`shiqchilardek tutishga harakat qiling. Bu muhim chiqish oldidan ovozingiz uchun ham mashq bo`ladi. Nutqdan bir necha daqiqa oldin qo`llar mashqini bajarishingiz mumkin. Buning uchun kaftlaringizni bir-biriga chalishtirib, ikki qo`lingizning bosh barmoqlarini bir-birining atrofida aylantiring. Bu oddiy mashq asabiylikni bartaraf etadi.

7. Bilimni oshirish vaqti keldi!

Ishxonada navbatdagi attestasiya. Oldinda muhim imtihon kutayapti. Ishingizdan ayrilishingizdan cho`chib, xotirjamlikni yo`qotishingiz mumkin.

Tez yordam. Ko`pchilik imtihondan bir kun oldin kitob varaqlashga, bilimini oshirishga harakat qiladi. Bu esa har doim ham o`zini oqlayvermaydi. Ishingiz yuzasidan qiziq voqealarni ham esga olib, tayyorgarlik ko`rib qo`ying. Bu jimgina turgandan ko`ra ya`shiroq. Bilimingiz «5»ga loyiq bo`lmasa, hech bo`lmasa qiziquvchanligingiz atrofdagilarni jalb etishi aniq.