Janubiy Afrika sobiq prezidenti va jahon Nobel mukofoti sohibi Nelson Mandela 95 yoshida vafot etdi. Bu haqda bugun kechasi mamlakatning hozirgi prezidenti Jeykob Zuma xabar berdi.
Ma`lumotlarga qaraganda, Mandela Yoxannesburgdagi uyida uzoq vaqt betoblikdan so`ng vafot etgan. U o`pka infeksiyasidan aziyat chekkan.
Zumaning televizion murojaatida aytilishicha, Mandela davlat tomonidan izzat-ikrom bilan dafn etiladi. JAR prezidenti sobiq rahnamo hotirasiga barcha bayroqlarni tushirishni buyurdi.
JAR tarixidagi ilk qoratanli prezident Nelson Mandela 1918 yilning 18 iyul kuni Kunu qishlog`ida (bantustan Transkey) qabila boshlig`i oilasida tavallud topgan.
U tug`ilganda unga «Rolixlaxla» ismi berilgan. Maktabda chog`ida u britancha Nelson ismiga o`zgartirilgan.
JAR prezidenti lavozimini 1994-1999 yillarda egallagan Nelson Mandela aparteid davrida inson huquqlari uchun kurashgan eng mashhur faollardan bo`lib, buning uchun u 27 yil qamoqda o`tirib chiqqan.