Davlatimiz rahbari Shavkat Mirziyoev 15 oktyabr kuni Xorazm viloyati musiqali drama teatrini borib ko`rdi.
Xorazm viloyati musiqali drama teatri 1975 yilda qurilgan. Prezidentimiz tashabbusi bilan shu kunlarda teatr binosi, jumladan, 572 tomoshabinga mo`ljallangan zal kapital ta`mirlanmokda, deb xabar beradi O`zA.
Teatr sahna dekorasiyalari va konstruksiyalari, liboslar, grim va postijer mahsulotlari, parda va boshqa buyumlar bilan ta`minlanadi.
Prezidentimiz teatr mutasaddilari bilan muloqotda teatr faoliyatining mazmun-mohiyatini yanada boyitish bo`yicha o`z fikr-mulohazalarini bildirdi.
Teatrni haqiqiy ma`naviyat o`chog`iga aylantirish uchun avvalo yaxshi asarlar kerak, dedi davlatimiz rahbari. Xorazmning buyuk tarixi bor. Ulug` allomalarimiz, shu bilan birga zamonamiz qahramonlari haqida sahna asarlari yaratish zarur.
Ijodkorlarni qo`llab-quvvatlash, ular uchun zamonaviy uy-joy qurib berish, teatrning moddiy-texnik bazasini mustahkamlash bo`yicha ko`rsatmalar berildi. Aktyor va rejissyorlarning malakasini oshirish, yosh mutaxassislar tayyorlash masalalariga alohida e`tibor qaratildi.
