Xalq deputatlari Sherobod tuman Kengashining navbatdan tashqari sessiyasi bo`lib o`tdi. Unda tashkiliy masala ko`rildi, deya xabar bermoqda “Xalq so`zi nashri”.
Xabarda aytilishicha, Sherobod tumanini ijtimoiy-iqtisodiy rivojlantirish, aholining turmush farovonligini yuksaltirish borasida salmoqli ishlar olib borilmoqda. Xususan, yiliga 1,5 million tonna sement ishlab chiqarish quvvatiga ega sement zavodi, yiliga 15 ming tonna ip-kalava, 5 ming tonna bo`yalgan ip-kalava, 4 ming tonna trikotaj mato, 2,5 million dona tikuvchilik mahsulotlari ishlab chiqarish quvvatiga ega "Sherobod tekstil invest" to`qimachilik fabrikasi kabi yirik loyihalar hayotga tadbiq etilayotir.
Ammo, yutuqlar bilan birga ayrim kamchiliklar ham uchrab turibdi. Jumladan, joriy yilning 9 oyi davomida fuqarolardan tushgan murojaatlarning 80 foiziga faqatgina tushuntirish berilgan, mutasaddi idoralarda murojaatlar bilan ishlash, masalani hal etishning ahvoli qoniqarsiz.
Shuningdek, aholining kommunal to`lovlardan qarzdorligi yuqori darajada saqlanib qolayotgani, ichki yo`llarni ta`mirlash, tumanning eksport salohiyati past ahvolda ekani, erlarning meliorativ holatini yaxshilash, qishloq xo`jaligida agrotexnik tadbirlarning o`z vaqtida olib borilmayotgani tuman iqtisodiyotiga salbiy ta`sir ko`rsatayotgani qayd etildi.
Tuman hokimi vazifasida ishlab kelayotgan Abdulxakim Eshmuratov lavozimidan ozod etildi.
Faollar, deputatlar, siyosiy partiyalar vakillarining taklif va mulohazalari inobatga olinib, uning o`rniga shu kunga qadar Surxondaryo viloyati hokimining qishloq va suv xo`jaligi masalalari bo`yicha o`rinbosari vazifasida ishlab kelayotgan O`rol Abrayqulovich Boboqulov tasdiqlandi.
