Murojaatlaringizga advokat Nafisa IBRAGIMOVA javob beradi. Eslatib o`tamiz, mutaxassis izohi tavsiyaviy xarakterga ega.
– Farzandimga aqli zaiflik bo`yicha nogironlik belgilangan. Uning parvarishi bilan band bo`lib, 15 yil hech qaerda ishlamadim. Yaqinda ishga joylashdim. Eshitishimcha, bolasi nogiron onalardan daromad solig`i ushlab qolinmas ekan. Haqiqatan ham shundaymi? Buning uchun qaerga va qanday hujjatlar bilan murojaat qilishim zarur?
Gavhar Teshaeva, Buxoro viloyati
— O`zbekiston Respublikasi Soliq kodeksining 180 – moddasi, 12 bandida bolaligidan nogiron bo`lgan, doimiy parvarish talab qilinadigan farzandi bilan birga yashab, uni tarbiyalayotgan ota-onadan biri daromad solig`idan ozod qilinishi nazarda tutilgan. Imtiyoz pensiya guvohnomasi yoki sog`liqni saqlash muassasasining doimiy parvarish zarurligini tasdiqlovchi tibbiy ma`lumotnomasi, fuqarolarning o`z-o`zini boshqarish organi ma`lumotnomasi (birgalikda yashashga taalluqli qismida) asosida beriladi. Imtiyoz jismoniy shaxsning asosiy ish joyi bo`yicha qo`llanadi.
