Adliya vazirligining telegramdagi "Huquqiy axborot" (@huquqiyaxborot) kanalida bu savolga quyidagicha javob beriladi.
Ma`muriy javobgarlik to`g`risidagi kodeksning 223-moddasiga ko`ra, pasporti bo`lishi shart bo`lgan fuqaroning pasportni qasddan yaroqsizlantirishi, shuningdek, pasportni beparvolik bilan saqlashi va buning oqibatida pasportning yo`qolishi eng kam ish haqining ikkidan bir qismidan uch baravarigacha miqdorda jarima solishga sabab bo`ladi.
Xuddi shunday huquqbuzarlik ma`muriy jazo chorasi qo`llanilganidan keyin bir yil davomida takror sodir etilgan bo`lsa, eng kam ish haqining besh baravari miqdorida jarima solishga sabab bo`ladi.
Bundan tashqari, Prezidentning 2011 yil 5 yanvardagi farmoni bilan tasdiqlangan O`zbekiston Respublikasida pasport tizimi to`g`risidagi Nizomda ham javobgarlik pasportni ataylab yaroqsiz holga keltirganlik uchun belgilanishi nazarda tutilgan.
Shunday qilib, bu holatda jarima solish uchun avvalambor pasport qasddan yaroqsizlantirilgani isbotlanishi lozim. Bu isbotlangan taqdirda ham aybdor fuqaro jarima miqdorini eng kam ish haqining ikkidan bir qismi miqdorida belgilashni so`rash huquqiga ega.
