Saudiya Arabistonining “Al Hilol” klubi OFK tomonidan 1000 AQSh dollari miqdorida jarimaga tortilishi mumkin. Bu haqda Championat.Asia sayti xabar bermoqda.
“Chunki bu jamoa o`yindan oldingi matbuot anjumanida OChL reglamentining bir bandiga amal qilmadi”,-deyiladi xabarda.
Osiyo chempionlar ligasi reglamentining 54-moddasi matbuot anjumanlariga bag`ishlangan bo`lib, o`yindan oldingi matbuot anjumanida har ikkala jamoadan bosh murabbiy va bir nafar futbolchi ishtirok etishi shart qilib qo`yilgan.
Faqat gap shundaki, matbuot anjumaniga kelgan futbolchi ertasi kun jamoasining asosiy tarkibi maydonga tushishi lozim bo`ladi. Bu haqda 54-moddaning “b” bandida yozib qo`yilgan. Matbuot anjumaniga murabbiy asosiy tarkib futbolchisi bilan kelishi kerak degan yozuv bor OChL reglamentida. Masalan, “Bunyodkor”dan Oleg Zoteev ishtirok etdi va o`yinni asosiy tarkibda boshladi.
Ammo “Al Hilol” bosh murabbiyi Sami Al Jaber reglamentning mana shu joyiga amal qilmadi. O`yindan oldingi matbuot anjumaniga avvaliga Muhammad Al Shlhubning kelishi kutilgandi, biroq murabbiy o`zi bilan 17-raqamdagi Abdulloh Al Hafitni olib keldi. 1992 yilda tug`ilgan futbolchi esa ertasi kuni nafaqat asosiy tarkib, balki zaxiradigilar ro`yxatiga ham kiritilmadi. Umuman olganda, bu futbolchi Osiyo chempionlar ligasining hozircha birorta o`yinida maydonga tushgani yo`q.
“Bu bilan Sami Al Jaber reglamentning aynan shu bandiga amal qilmagan bo`lib chiqyapti va “e” bandiga ko`ra ming dollar miqdorida jarimaga tortilishi mumkin. O`yindan oldingi matbuot anjumanida mana shunaqa holat ro`y berganini OFKda ishlaydiganlar inobatga oldimi-yo`qmi, bunisidan hozircha bexabarmiz”,-deya qayd qilib o`tadi Championat.Asia.
Eslatib o`tamiz, bir necha hafta avval Qatarning “Al-Jaish” klubi Osiyo Futbol Konfederasiyasiga rasmiy shikoyat yozib, “Bunyodkor” FKni OChL-2014 musobaqalaridan chetlatishni so`ragandi. Qatarliklar saralash bahslarida “Lokomotiv” safida to`p tepgan himoyachi Anvar G`ofurovni turnirning guruh bosqichida “Bunyodkor” jamoasi uchun o`ynayotganini xato deb ko`rsatishgan.
2 may kuni esa OFKning tartib-intizom qo`mitasi yig`ilish o`tkazdi va “Al-Jaish” e`tirozi o`rinsiz deb topilib, “Bunyodkor” musobaqani davom ettirishi ma`lum qilindi.
