“Eldas” mas`uliyati cheklangan jamiyatining ilmiy xodimi Durbek Yakubov avtofurgonlar, temir yo`l sisternalari, omborxonalar eshiklarini qulflash va bir paytning o`zida plombalash imkonini beruvchi berkitish-plombalash uskunasini ixtiro qildi.
Bu haqda O`zbekiston Respublikasi Intellektual mulk agentligining rasmiy saytida ma`lum qilindi.
Mazkur uskunaning konstruksiyasi o`ta pishiq hamda mukammal texnik echimga egaligi, shuningdek, zamonaviy xavfsizlikni ta`minlash talablariga to`liq javob berishi bilan turdoshlaridan tubdan farq qiladi.
Yangi qurilmaning afzalligi shundaki, u ochishga bardoshliligi, ya`ni ishonchlilik darajasi yuqoriligi bilan o`ziga xosdir. Uni qulflashda ko`p kuch sarfi ham talab qilinmaydi.
Uni sanoat ishlab chiqarishning barcha sohalari hamda boshqa tarmoqlarda qo`llash imkoniyati mavjud.
