12 iyun kuni Braziliyada futbol bo`yicha jahon chempionati start oladi. Hozircha O`zbekiston Sport telekanali ushbu musobaqani translasiya qilish yoki qilmasligi noma`lum.
Uff.uz saytining ma`lumotiga ko`ra, bu borada muzokaralar olib borilmoqda. "O`zbekiston milliy teleradiokompaniyasidagi norasmiy manbalarning ta`kidlashicha, o`zbekistonlik futbol muxlislari Jahon chempionati o`yinlarini nasib etsa, albatta tomosha qiladi. Bu masala Milliy teleradiokompaniyada bo`lib o`tgan majlisda muhokama qilindi hamda ijobiy yakun topishga yaqin", - deyiladi xabarda.
Shuningdek xabarda ta`kidlanishicha, agar JCh o`yinlari translyasiyasi xarid qilinadigan bo`lsa, O`zbekiston milliy teleradiokompaniyasining Sport telekanali orqali mundial o`yinlari o`zbekcha sharhda efirga uzatiladi. UzHD kanali orqali esa Rossiyaning Sport 1 HD kanalida namoyish etiladigan o`yinlar ruscha sharhda beriladi.
Yurtimizda kabel televideniesi orqali efirga uzatilayotgan, Braziliyadagi JCh o`yinlarini translyasiya qiladigan Rossiyaning VGTRK kanallari ("Rossiya", "Rossiya 2", "Sport 1", "Sport 1 HD" ) mundial payti vaqtincha o`chirib qo`yiladi.
Nashrning qayd etishicha, yuqoridagi ma`lumotlar hali rasman tasdiqlangani yo`q.
Shanba kuni tunda bo`lib o`tadigan Evropa chempionlar ligasi final uchrashuvi translasiya qilinish yoki qilinmasligi ham so`roq ostida turibdi. Sababi Atletiko-Real uchrashuvi ushbu hafta uchun taqdim etilgan teledasturga kiritilmagan. Biroq Championat.Asia saytining xabar berishicha, EChL final uchrashuvi to`g`ridan-to`g`ri efirga uzatiladi.
