Toshkentda badiiy gimnastika bo`yicha jahon kubogi bosqichi va “Happy Caravan” xalqaro turniri boshlandi
Badiiy gimnastika bo`yicha bolalar-o`smirlar respublika ixtisoslashgan olimpiya zaxiralari sport maktabida mazkur nufuzli musobaqalarning tantanali ochilish marosimi bo`ldi.
Shu kunlarda sport jamoatchiligi va badiiy gimnastika muxlislarining e`tibori poytaxtimizga qaratilgan. Xalqaro gimnastika federasiyasi shafeligida O`zbekiston gimnastika federasiyasi, Madaniyat va sport ishlari vazirligi, Milliy olimpiya qo`mitasi hamkorligida tashkil etilgan badiiy gimnastika bo`yicha jahon kubogi bosqichi va “Happy Caravan” xalqaro turniri yana eng kuchli gimnastikachilarni musobaqaga chorlamoqda, deya xabar beradi O`zA.
Bayramona bezatilgan muhtasham sport saroyi mehmonlar, sportchilar va muxlislar bilan gavjum. Chorlov sadolari ostida maydonga jahon kubogi bosqichi va “Happy Caravan” xalqaro turniri ishtirokchilari – O`zbekiston, Xitoy, Janubiy Koreya, Yaponiya, AQSh, Chexiya, Latviya, JAR, Malayziya, Meksika, Rossiya, Ozarbayjon, Armaniston, Belarus, Vetnam, Isroil, Hindiston, Italiya, Qozog`iston, Qirg`iziston terma jamoalari kirib keladi.
Badiiy gimnastika bo`yicha hududiy federasiyalar va markazlar tashkil etilgani tufayli sportning ushbu nafis turi bilan muntazam shug`ullanayotgan qizlar safi tobora kengayib bormoqda. Mamlakatimizda badiiy gimnastikaning jadal ommalashayotgani qizlarimizning jismonan va ma`nan sog`lom voyaga etishiga xizmat qilishi bilan birga, ular orasidan xalqaro maydonlarda Vatanimiz sharafini munosib himoya qilishga qodir sportchilar etishib chiqishida ham muhim ahamiyat kasb etmoqda.
– O`zbekistonda ko`plab sohalar singari sportni, jumladan, bolalar va xotin-qizlar sportini rivojlantirishga qaratilayotgan doimiy e`tibor yuksak samaralar berayotir, – deydi Xalqaro gimnastika federasiyasi vakili Noha Abu Shabana. – Buni Toshkent shahrida badiiy gimnastika bo`yicha nufuzli xalqaro musobaqalar muntazam ravishda o`tkazilayotgani, O`zbekistonda barcha sport anjumanlarini yuksak saviyada tashkil etish bo`yicha katta tajriba to`planganida ham ko`rish mumkin.
Toshkent shahrida boshlangan badiiy gimnastika bo`yicha jahon kubogi bosqichida dunyoning eng kuchli 80 nafarga yaqin gimnastikachisi, “Happy Caravan” xalqaro turnirida 40 nafardan ziyod o`smir qizlar shaxsiy va guruh bahslarida arg`amchi, xalqa, to`p, bulava, tasmada mashq bajarish hamda ko`pkurash bo`yicha o`z iste`dod va mahoratini namoyish etmoqda.
Mazkur nufuzli musobaqalarda Vatanimiz sharafini Jamila Rahmatova, Elizaveta Nazarenkova, Anora Davlatova, Nilufar Shomurodova va Jasmin Yusupova singari gimnastikachilarimiz himoya qilmoqda.
