Kamoliddin Behzod nomidagi Sharq miniatyura san`ati muzeyida mamlakatimizda o`tayotgan Tasviriy va amaliy san`at festivali doirasida rossiyalik rassom Aleksey Dmitriev ijodiga oid ko`rgazma tashkil etildi.
Ko`rgazmada Leonid Solovyov qalamiga mansub "Xo`ja Nasriddin haqida hikoya" kitobiga rassom tomonidan ishlangan suratlar, chizgi va eskizlar tomoshabinlar e`tiboriga havola etilmoqda.
Quv hamda mug`ombir, topqir va hozirjavob Xo`ja Nasriddin xalqimizda Nasriddin Afandi nomi bilan ham mashhur. Bu jihatlar rossiyalik musavvir ijodida ham yaqqol aks etgan.
– Men bu san`at festivalida qatnashayotganimdan juda mamnunman, – deydi musavvir A.Dmitriev. – Mazkur ijodiy loyiha turli davlatlarning ijodkorlari bilan o`zaro fikr almashishda, ishlari bilan batafsil tanishishda, yangi-yangi nomlarning kashf etilishida muhim ahamiyat kasb etadi. Biz talabalik chog`imizda bunday tadbirlar, festival va yirik ko`rgazmalar haqida faqat orzu qilar edik.
Tadbir doirasida rossiyalik rassom ishtirokida kitob grafikasi bo`yicha mahorat saboqlari ham o`tkazildi.
