Uzoq yillar davomida AQShning Markaziy Osiyoga nisbatan siyosatida muhim rol o`ynab kelgan Daniel Rozenblum yaqin orada Toshkentda yangi elchi sifatida ish boshlashi kutilmoqda. Bu haqda "Xalq so`zi" nashri xabar berdi.
23 avgust kuni u AQSh Senati qoshida so`zlab, o`z maqsadlarini tushuntirdi. Endi u Senat tasdig`idan o`tishi kerak.
“Butunlay suveren O`zbekiston kim bilan qanday hamkorlik qilishni erkin tanlay olishi Amerika manfaatlari uchun xizmat qiladi”, — dedi Rozenblum qonunchilar oldida so`zlar ekan.
Uning fikricha, erkinlik va qonun ustuvorligi O`zbekistonni yorqin kelajak tomon etaklovchi eng muhim omillardir.
Respublikada Prezident Shavkat Mirziyoev boshchiligida keng qamrovli islohotlar boshlangan. Ularning ijobiy natijalar berishi uchun AQSh o`z hissasini qo`shishi, O`zbekiston xalqini yaqindan quvvatlashi kerak, dedi diplomat.
Xo`sh, Rozenblum faoliyati davomida nimalarga alohida e`tibor qaratmoqchi? Bular quyidagilar:
1. Afg`onistonda tinchlikni ta`minlash, mintaqa xavfsizligini himoya qilish, xalqaro muammolarga qarshi kurashda faollik ko`rsatish.
2. O`zbekistonda islohotlar jadallashishi yo`lida harakat qilish. Hozirgiga qaraganda barcha jabhalarda ko`proq madad ko`rsatish.
3. AQSh xususiy sektorini jalb etib, investisiya qilish uchun zarur sharoit yaratilishida ko`maklashish.
4. Inson huquqlari va erkinlikni targ`ib qilish. Ijobiy o`zgarishlarni olqishlab, kamchilik va muammolarni konstruktiv tarzda tanqid qilib, tizim yaxshilanishiga hissa qo`shish.
5. Ikki xalqni yaqinlashtirish — turli almashinuv dasturlari, madaniy va ilmiy programmalar orqali yoshlarga imkoniyatlar yaratish, hamjihatlik va o`zaro hamkorlikni mustahkamlash.
Rozenblum 2014 yildan beri AQShning Markaziy Osiyoga nisbatan diplomatiyasiga bosh-qosh edi. Ungacha Davlat departamentida turli boshqa lavozimlarda ham mintaqa, xususan O`zbekiston bilan ishlagan.
Kasaba uyushmalari va mehnat huquqlari bo`yicha ham tajriba ega, chunki bu yo`nalishlarda ham xizmat qilgan.
Rozenblum AQShning nufuzli El va Jons Xopkins universitetlarini bitirgan. Ogayo shtatidan ziyoli oilasidan chiqqan. Oilali, ikki farzandi bor.