Xabar berganimizdek, Tailandning Bangkok shahri mezbonlik qilayotgan boks bo`yicha Osiyo chempionatida bundan biroz avval yarim final janglari boshlandi. Bugungi janglarda 9 nafar bokschimiz ringga ko`tarilishidan xabaringiz bor.
Dastlab 49 kg.gacha bo`lgan vazn toifasida ringga ko`tarilgan hamyurtimiz Nodirjon Mirzahmedov final yo`llanmasini qo`lga kiritdi. U final ostonasida Qirg`iziston terma jamoasi a`zosi Mirlan Turkbai Uuluni ochkolar hisobiga ko`ra mag`lub etdi.
Uning finaldagi raqibi ham ma`lum bo`ldi. Ushbu vaznda g`oliblikka da`vogarlardan biri qozog`istonlik Temirtas Jusupov yarim final jangida ringga chiqa olmadi. Natijada hindistonlik Dipak jangsiz finalga yo`l oldi va u Mirzahmedovga qarshi oltin medal uchun jang qiladi.
Hozirgina Osiyo chempionatining 56 kg.gacha vazn toifasidagi yarim final bosqichidan o`rin olgan jang o`z yakuniga etdi. Unda terma jamoamiz a`zosi Mirazizbek Mirzahalilov filippinlik Pedres Bautistaga qarshi jang o`tkazdi. Uch raund to`liq davom etgan jangda Mirazizbek raqibini ochkolar hisobida mag`lub etdi. Shu tariqa, ikkinchi bokschimiz ham final yo`llanmasini qo`lga kiritdi. Oldinda yana etti nafar bokschimiz turibdi va ularga ham omad tilaymiz.
Eslatib o`tamiz, Osiyo chempionatining yarim finaliga O`zbekistondan 9 nafar bokschi etib kelgan bo`lsa, qo`shni Qozog`istonda bu ko`rsatkich 11 nafarni tashkil qilgan edi.
