“O`zbekneftgaz” AJ boshqaruv raisi Bahodirjon Sidiqov Rossiyaning "Gazprom EP International B. V." kompaniyasining boshqaruv direktori Fik Andrey boshchiligidagi delegasiya bilan uchrashdi. Bu haqda "O`zbekneftgaz" AJ matbuot xizmati ma`lum qildi. Xabarda aytilishicha uchrashuvda Rossiya kompaniyaning O`zbekistonda tadbiq etilayotgan loyihalari muhokama qilingan.
Uchrashuv davomida tomonlar O`zbekistondagi investisiya bloklarida (Buxoro-Xiva neft-gaz hududi, G`arbiy Farg`ona, Chinobod, Uzunquyin, Surxon, Chegara-Tagmon, Kossor investisiya bloklari) hamkorlikda amalga oshirilayotgan geologiya-qidiruv ishlariga oid loyihalarni ko`rib chiqishgan.
Xabarga ko`ra, joriy yilning noyabr oyi oxiriga qadar "Gazprom" AJ Chegara-Tagmon investisiya blokida hamda 2020 yil yanvar oyida Chinobod, Uzunquyin va Kossor investisiya bloklarida geologiya-qidiruv ishlarini olib borish bo`yicha korporativ qarorining qabul qilinishi kutilmoqda.
Shuningdek, mahsulotlarni taqsimlash to`g`risidagi bitim shartlariga ko`ra, Ustyurt hududidagi Jel konida ishlab chiqarishni yo`lga qo`yish uchun 2020 yil iyul oyiga qadar TIA (Texnik-iqtisodiy asoslash) loyihasini ishlab chiqish rejalashtirilgan.
Bundan tashqari, 2017 yil 2 iyunda "Gazprom" AJ va “O`zbekneftgaz” AJ o`rtasida tuzilgan strategik hamkorlik bitimiga asosan, "O'zLITIneftgaz" AJ faoliyatini yanada rivojlantirish uchun tomonlar jamiyat negizida ilmiy-texnologik markaz tashkil etishga kelishganlar.
Ma`lumot uchun: «O’ZLITINEFTGAZ» AJ – respublika neftgaz tarmog`i ilmiy-loyiha vazifalarini echish bo`yicha ilmiy xodimlar va mutaxassislarning yuqori ilmiy-texnikaviy salohiyatini va boy tajribasini birlashtirgan yirik markazdir.
