“Ўзбекнефтгаз” АЖ бошқарув раиси Баҳодиржон Сидиқов Россиянинг "Gazprom EP International B. V." компаниясининг бошқарув директори Фик Андрей бошчилигидаги делегация билан учрашди. Бу ҳақда "Ўзбекнефтгаз" АЖ матбуот хизмати маълум қилди. Хабарда айтилишича учрашувда Россия компаниянинг Ўзбекистонда тадбиқ этилаётган лойиҳалари муҳокама қилинган.
Учрашув давомида томонлар Ўзбекистондаги инвестиция блокларида (Бухоро-Хива нефт-газ ҳудуди, Ғарбий Фарғона, Чинобод, Узунқуйин, Сурхон, Чегара-Тагмон, Коссор инвестиция блоклари) ҳамкорликда амалга оширилаётган геология-қидирув ишларига оид лойиҳаларни кўриб чиқишган.
Хабарга кўра, жорий йилнинг ноябрь ойи охирига қадар "Gazprom" АЖ Чегара-Тагмон инвестиция блокида ҳамда 2020 йил январь ойида Чинобод, Узунқуйин ва Коссор инвестиция блокларида геология-қидирув ишларини олиб бориш бўйича корпоратив қарорининг қабул қилиниши кутилмоқда.
Шунингдек, маҳсулотларни тақсимлаш тўғрисидаги битим шартларига кўра, Устюрт ҳудудидаги Жел конида ишлаб чиқаришни йўлга қўйиш учун 2020 йил июль ойига қадар ТИА (Техник-иқтисодий асослаш) лойиҳасини ишлаб чиқиш режалаштирилган.
Бундан ташқари, 2017 йил 2 июнда "Gazprom" АЖ ва “Ўзбекнефтгаз” АЖ ўртасида тузилган стратегик ҳамкорлик битимига асосан, "O'zLITIneftgaz" АЖ фаолиятини янада ривожлантириш учун томонлар жамият негизида илмий-технологик марказ ташкил этишга келишганлар.
Маълумот учун: «O’ZLITINEFTGAZ» АЖ – республика нефтгаз тармоғи илмий-лойиҳа вазифаларини ечиш бўйича илмий ходимлар ва мутахассисларнинг юқори илмий-техникавий салоҳиятини ва бой тажрибасини бирлаштирган йирик марказдир.
