Yoshlarni oilaviy hayotga tayyorlash markazlari tashkil etiladi. Vazirlar Mahkamasining bu haqdagi tegishli qarori loyihasi muhokama uchun joylashtirildi.
O`zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazining, O`zbekiston Xotin-qizlar qo`mitasi va O`zbekiston yoshlar ittifoqining Qoraqalpog`iston Respublikasi, viloyatlar va Toshkent shahrining barcha tuman (shahar)larida Yoshlarni oilaviy hayotga tayyorlash markazlarini tashkil qilish to`g`risidagi taklifi ma`qullanishi mumkin.
Markazlar yuridik shaxs maqomiga ega bo`lmagan holda, “Oila” markazining tuman (shahar) bo`limlari huzurida tashkil etiladi.
Markazlarning asosiy vazifalari etib quyidagilar belgilanadi:
zamonaviy oilaning namunali shaklini xamda “Oila jamiyat va davlat himoyasida” konstitusiyaviy prinsipini, “Farovon oila - jamiyat ravnaqining asosi” konseptual g`oyasini nikohlanuvchilarning ongiga singdirib borish;
nikohlanuvchi shaxslarni oilaviy-huquqiy munosabatlar, oilaviy hayot psixologiyasi, oila iqtisodi va byudjeti, reproduktiv salomatlik asoslari, ma`naviy-axloqiy qadriyatlarni mustahkamlash masalalari bo`yicha tizimli tayyorlashni yo`lga qo`yish;
nikohlanuvchi shaxslarda oilaviy qadriyatlarni saqlash, oilalarda sog`lom ma`naviy-axloqiy muhitni yaratish hamda ibratli ota-ona bo`lish ko`nikmalarini shakllantirishda ko`maklashish;
mashg`ulotlar, nazariy-amaliy kurslar, mahorat saboqlari, davra suhbatlari, seminar-treninglarni ilg`or ijobiy xorijiy tajribalarni inobatga olib, o`quv jarayoniga eng so`nggi ilmiy-uslubiy texnologiyalar va reklama-axborot usullarini joriy etgan holda tashkil etish;
yosh oila holati va rivojlanishini har tomonlama o`rganish, jumladan monitoring tadqiqotini tashkil etish.
“Oila” markazining markaziy apparati, Qoraqalpog`iston Respublikasi, viloyatlar va Toshkent shahar boshqarmalari, tuman (shahar) bo`limlarida Xotin-qizlarni va oilani qo`llab-quvvatlash jamoat fondi mablag`lari hisobidan moliyalashtiriladigan qo`shimcha bittadan shtat birligi - yoshlarni oilaviy hayotga tayyorlash bo`yicha bosh mutaxassis lavozimi joriy etiladi.
Yoshlarni oilaviy hayotga tayyorlash markazlari faoliyatini moliyalashtirish manbai etib quyidagilar belgilanadi:
Xotin-qizlarni va oilani qo`llab-quvvatlash jamoat fondi, O`zbekiston yoshlar ittifoqining rivojlantirish jamg`armasi, mahalliy byudjet mablag`lari, homiylar va xalqaro tashkilotlar grantlari, qonun hujjatlari bilan taqiqlanmagan boshqa manbalar.
Markaz faoliyatini tizimli tashkil etish maqsadida:
a) Qoraqalpog`iston Respublikasi Vazirlar Kengashi, viloyatlar va Toshkent shahar xokimliklari:
FHDYo organlari markazlarga nikohni qayd etish uchun ariza bergan shaxslarning roziligi bilan shakllantirilgan ro`yxatini o`z vaqtida taqdim etilishini ta`minlaydi.
b) O`zbekiston yoshlar ittifoqi:
oila mavzusiga bag`ishlangan ta`sirchan videofilm, videoroliklar, infografik lavhalar mediatekasini tashkil etadi;
ishtirokchilarni nikoh va oila munosabatlarini targ`ib qiluvchi tarqatma materiallar bilan ta`minlaydi.
v) O`zbekiston Respublikasi Adliya vazirligi:
markazlarda nikohlanuvchi yoshlarga oiladagi er-xotin huquq va majburiyatlariga oid mashg`ulotlar o`tkazilishida amaliy yordam ko`rsatadi;
Yoshlarni oilaviy hayotga tayyorlash markazlari faoliyatini targ`ib etishda ko`maklashadi;
ishtirokchilarni oilaviy munosabatlarni tartibga soluvchi qonun hujjatlari bilan ta`minlaydi.
g) O`zbekiston Respublikasi Oliy va o`rta maxsus ta`lim vazirligi, Sog`liqni saqlash vazirligi va Respublika Ma`naviyat va ma`rifat markazi bilan birgalikda:
markazlarda yoshlarni oilaviy hayotga tayyorlash jarayoniga yuqori malakali mutaxassislar jalb qiladi;
markazlar faoliyatini ilmiy-metodik qo`llanmalar va tarqatma materiallar bilan ta`minlashda amaliy yordam ko`rsatadi.