Bir paytlar kino ijodkorlarning madaniy markazi hisoblangan “Kinochilar uyi” (“Dom kino”) Toshkent shahrida qayta tiklanadigan bo`ldi.
Bu haqda “O`zbekkino” Milliy agentligi bosh direktori Firdavs Abduxoliqov bugun poytaxtimizdagi “Media Hall NAESMI” markazida o`tkazilgan “Milliy kinematografiya: rivojlanish istiqbollari va ustuvor vazifalar” Respublika kinoforumida ma`lum qildi.
Tizimda joriy yilda amalga oshirilgan ishlar va 2020 yilda hal qilinishi kutilayotgan dolzarb masalalarga bag`ishlangan forumda tegishli idora va tashkilotlari rahbarlari, taniqli kino arboblari, soha mutaxassislari, san`atshunoslar, OAV vakillari ishtirok etdi.
“Bugun kinoijodkorlarni quvontiradigan bir xushxabar aytmoqchiman, - dedi F.Abduxoliqov. – Biz bir paytlar kino ustalarimizning sevimli maskani bo`lgan, xalq orasida “Dom kino” nomi bilan tanilgan maskanni o`z egalariga qaytarmoqchimiz”.
“O`zbekkino” rahbarining ta`kidlashicha, “Kinochilar uyi” bugungi “O`zbekkino” Milliy agentligi joylashgan bino yaqinidagi restoran negizida barpo etiladi. Ayni paytga restoran rahbariyati bilan muzokaralar olib borilgan. Bino sotib olingach, u “O`zbekkino” Milliy agentligi tasarrufiga o`tkaziladi va qayta rekonstruksiya qilinadi.
Eslatib o`tamiz, oldingi “Kinochilar uyi” binosi 1982 yilda, Osiyo, Afrika va Lotin Amerikasi mamlakatlari VII Toshkent kinofestivali arafasida bunyod etilgan. O`ttiz besh yil davomida ushbu maskanda bir qator yirik anjumanlar, yuzlab filmlarning taqdimoti o`tkazilgan. 2017 yilning oxirlarida bu hududda “Tashkent City” xalqaro ishbilarmonlik markazi qurilishi munosabati bilan “Kinochilar uyi” binosi buzilgan edi.
