Pol Gogenning ikki taitilik ayol tasvirlangan “Nafea Faa Ipoipo” (“Sen qachon turmushga chiqasan?”) deb nomlanuvchi surati 300 mln dollarga sotildi, deb xabar beradi kun.uz nashri The New York Times ma`lumotlariga tayanib.
Bu suratning egasi shveysariyalik kolleksioner Rudolf Shtexelin surat sotilganini tasdiqladi. Gazetaning xabar berishicha, surat Qatar muzeylari uchun san`at asarlarini sotib olish bilan shug`ullanadigan Qatar Museums tashkilotiga sotilgan. Natijada, ushbu surat dunyodagi eng qimmatbaho tasviriy san`at asariga aylandi.
Ma`lumot uchun, 1892 yilda chizilgan bu surat Shveysariyaning Bazel shahridagi Tasviriy sanat muzeyida 50 yildan ko`proq saqlangan. Bazel shahri meri Gay Morinning so`zlariga ko`ra, bu Bazel uchun sezilarli yo`qotish bo`ldi.
Suratning yangi egalari suratni faqatgina 2016 yilning boshida qo`lga kiritishadi, shundan so`ng, surat Madrid va Vashingtonda ko`rgazmaga qo`yiladi.
Pol Gogen – mashhur fransuz rassomi bo`lib, XIX asrning ikkinchi yarmida ijod qilgan. Taitida 8 yildan ko`proq yashagan Gogen postimpressionizm yo`nalishining eng yirik namoyandalaridan biri hisoblanadi.
