Bugun, 24 mart kuni poytaxtimizning Alisher Navoiy nomli kinoteatrida rejissyor Shuhrat Abbosov suratga olgan “Dilor, Dilor, Dil va or”, (ishchi nomi “Er tafti filmining maxsus taqdimoti bo`lib o`tdi. Ushbu taqdimotga san`atshunos va kinoshunoslar, matbuot va televidenie xodimlari tashrif buyurishdi.
Film taqdimotidan avval rejissyor Shuhrat Abbosovning hayot va ijod yo`liga nazar tashlaydigan film namoyish etildi. Shundan so`ng rejissyorning navbatdagi ijodiy ishi bo`lmish “Dilor, dilor, dil va or” filmi taqdim etildi.
Film qahramoni qishloq farzandi Dilorom. U yosh bo`lishiga qaramasdan, ko`p vaqtini dalada o`tkazadi. O`tgan asrning saksoninchi yillarida “Paxta ishi” deb atalgan qatag`onda otasi qamalganidan so`ng, Dilorom daladagi ishlarni o`zi davom ettiradi. Mustaqillik yillaridan so`ng “Paxta ishi” qayta ko`rib chiqilib, tuhmat bilan qamalganlar oqlanadi. Ular orasida Diloromning otasi ham bor edi. Hukumat tashabbusi bilan qishloqda fermerlik harakati boshlanib, Dilorom ham fermer bo`lishga ahd qiladi. Harakatlari zoe ketmagan Dilorom nihoyat fermerga aylanadi va bor mehrini dalaga beradi. Muhabbatning ayriliq azoblari hamda og`ir mehnatni boshidan o`tkazgan Diloromning harakatlari zoe ketmaydi.
Sahnalashtiruvchi rejissyor: Shuhrat Abbosov, Nozim Abbosov.
Filmda xalqimiz boshiga tushgan musibatlar ishonarli, jonli tarzda ko`rsatib berilgan. Aktyorlar jamoasining to`g`ri tanlanganligi, o`tgan asrning saksoninchi yillari muhiti aniq-tiniq ko`rsatilgani bilan film tomoshabinni o`ziga sehrlab qo`yadi.
Rejissyorning mahorati sabab kino olamiga endigina qadam qo`yayotgan yosh aktyorlarning ham ijrosi ishonarli chiqqan.
Filmni tomosha qila turib, uning ustida haqiqiy professionallar, o`z ishining fidoyilari ishlaganini his qilasiz.
