Saudiya Arabistoni qiroli Salmon bin Abdul Aziz Ol Saudning ukasi va ikki jiyani davlatga xiyonatda ayblanib hibsga olindi. Livanning Al-Akhbar gazetasiga tayanib, xabar berilishicha, shahzodalar Ahmad bin Abdul Aziz, Muhammad bin Naif va uning ukasi Navvof bin Naif o`lim jazosiga yoki bir umrlik qamoq jazosiga hukm qilinishi mumkin.
Ular qirollik saroyi qo`riqlash xizmati tomonidan ushlangan, ularning uylarida tintuv o`tkazilgan.
“Qirolning ukasi Ahmad va shahzodalar Muhammad hamda Navvofning qaerda ekanligi noma`lum“, — deb yozadi Al-Akhbar.
Saudiya Arabistonining merosxo`r shahzodasi rahbarligidagi korrupsiyaga qarshi kurashish bo`yicha oliy qo`mita 2017 yil noyabrda Ar-Riyodda qirollik oilasining o`nlab a`zolari, davlat xizmatchilari va tadbirkorlarni moliyaviy hamda lavozimiy jinoyatlarda ayblab hibsga olgandi. Ayblanuvchilarning deyarli barchasi etkazilgan zararni qoplash uchun o`z aktivlarining bir qismini davlatga berishga rozi bo`lgan.
