Ijtimoiy tarmoqlarda "Yakkabog`da nima sababdan fermerning piyoz ekilgan ekin maydoni “haydab” tashlandi?" degan sarlavhali video tarqaldi. Unda shu yilning 21 may kuni soat 10.30 lar atrofida Qashqadaryo viloyati Yakkabog` tumani Darxon MFY istiqomat qiluvchi Murodulla Xudoynazarovning fermer xo`jaligidagi tortishuv aks etgan.
Ma`lum bo`lishicha, 2019 yil sentyabrida bo`sh erdan (taxminan 60 sotix) unumli foydalanish maqsadida fermer ekin ekadi. 2020 yil 21 may kuni tegishli idoralardan kelgan ayrim mutasaddi xodimlar hech qanday yozma ogohlantirishsiz pishib etilayotgan hosil maydonini buzdirib tashlashadi va piyoz yo`q qilinadi.
Video orqali murojaat qiluvchilar tegishli organlardan voqea joyiga kelib, jarayonni o`rganib, xolisona oydinlik kiritishlarini va tegishli chora ko`rishlarini so`rashgan.
Va o`z navbatida ushbu video murojaatga viloyat IIBsi munosabat bildirdi. Unda atilishicha “Xudoynazarov Murodulla Bobomurodovich” fermer xo`jaligiga tuman hokimining qarori bilan 102,1 gektar er maydoni ajratib berilgan.
Fermer joriy hosil yilida boshoqli don etishtirish uchun rejaga asosan 50,0 gektar er ajratilgan bo`lsada, reja o`rniga 52 gektar joyga ekgan. Paxtachilik bo`yicha 37,9 gektar maydonda chigit ekish rejalashtirilgan bo`lib, ammo 35,8 gektariga chigit qadalib, fermer tomonidan belgilangan rejaga nisbatan 2,3 gektar joyga chigit ekilmasdan, aksincha Er kodeksi talablarini buzgan holatda, o`zboshimchalik bilan noqonuniy ravishda 6,1 gektar maydonga beda va 1,40 gektar maydonga piyoz ekkanligi, 1,0 gektar er maydoni esa samarasiz bo`sh turgan.
2020 yilning 21 may kuni tegishli idoralarning vakillari fermer xo`jaligiga borishib, noqonuniy ekilgan ekinlarni buzayotganlarida fermer xo`jaligi raisi Xudoynazarov Murodulla Bobomurodovich va uning kuyovi qonuniy talablarga bo`ysunmasdan, ularga qarshilik ko`rsatishni boshlashgan.
Vrqea joyida bo`lgan fuqaro F.M.Dagarov sodir bo`layotgan jarayonni o`zining qo`l telefoni yordamida videotasvirga olib, internet ijtimoiy tarmog`iga joylashtirgan.
Mazkur holat yuzasidan Qashqadaryo viloyati IIB mas`ul xodimlari tomonidan xizmat tekshiruvi o`tkazilmoqda, deyiladi viloyat IIB munosabatida.
Shundoq ham karantinda qiynalgan aholi jabr bo`lmasligi kerak edi deb o`ylaymiz. Tayyor hosilni "haydab" tashlash qanchalik insofdan? Tasvirga olayotgan fuqaroning haqoratlanganlarga qonunga muvofiq qanday chora ko`raladi? Bu savollar hozircha javob kutmoqda.
