Bugungi kunda o`zbek futbolida Ravshan Ermatovning tutgan o`rni nihoyatda katta. hakam sifatida O`zbekiston nomini butun dunyoga tanitib borayotgan yurtdoshimizning erishayotgan yutuqlariga har qancha havas qilsa, arziydi. Ermatov yildan-yilga yangidan yangi yutuqlarni, marralarni zabt etib boryapti. duyon futbolida o`z nomini zarhal harflar bilan yozgan Ravshan Ermatov “Darakchi” gazetasining navbatdagi mehmoni bo`ldi...
— Ravshan aka, Vatanimiz istiqlolga erishganidan so`ng o`zbek sporti nufuzi qay darajada oshdi deb o`ylaysiz?
— Vatanimiz Mustaqil bo`lganidan so`ng avvalambor o`zbek sportchilarining oldida keng imkoniyatlar eshigi ochildi. Chunki istiqlolga ega chiqqanimizdan so`ng sportchilarimiz yurtimiz sharafini xalqaro maydonlarda himoya qilishni boshladi. Bu esa eng katta yutuqlarimizdan biri bo`ldi. Bir so`z bilan aytadigan bo`lsam, hozirga qadar sport ortidan nimalarga erishgan bo`lsak, hammasiga aynan shu istiqlol davrida erishdik. Halibundana ko`prog`iga erishimiz kerak.
Birinchi navbatda millionlar o`yini — futbolga e`tibor nihoyatda oshdi. Buning samarasini ham ko`ra boshladik. O`zbek futbolining poydevori yaratildi. Futbol maktablari, akademiyalaridan iborat infratuzilma paydo bo`ldi. Ishonchim komilki o`zbek futbolining yutuqlari hali oldinda, bugungacha erishganlarimiz bilan cheklanib qolmaymiz hamda o`sishda bardavom bo`lamiz.
— Futbol bo`yicha ikkita jahon chempionatida qatnashib, 9 ta uchrashuvni odilona boshqarib, rekord o`rnatdingiz. Navbatdagi jahon chempionatiga qadar biroz vaqt bor. Aytingchi, bu rekordingiz oldinda turgan maqsadlar uchun tramplin vazifasini bajaradimi?
— Albatta. Bilasizmi, sportda o`z oldingizda katta maqsad yoki vazifa qo`ymasangiz, intilishda davom etmasangiz, o`sish bo`lmaydi. Biror yutuqga erishganingizdan keyin, yangi marralarni zabt etish haqida o`ylashingiz kerak bo`ladi. Sportchi oldiga doimo yuqori maqsadlar qo`yishi, shunga yarasha ishlab borishi shart. Mehnatsiz natija bo`lmaydi. Jahon chempionati bu juda katta musobaqa hisoblanadi. Bu musobaqani butun dunyo to`rt yil davomida kutadi. Ikkita musobaqada o`yinlarni boshqargan bo`lsak-da, hali qiladigan ishlarimiz ko`p deb bilaman. Oldinda turgan musobaqaga tayyorgarlik ko`rishimiz va yanada yaxshiroq natijalar uchun kurashishimiz lozim. Yurtimiz sharafini jahon chempionatida munosib tarzda himoya qilish imkoniyatimiz bor. Shundan foydalanib qolish uchun mehnat qilish kerak.
— Jahon chempionatlari ishtirokchisi, Osiyoning eng yaxshi hakami, klublar o`rtasidagi mundialning final bahsi singari yirik musobaqalarda qatnashgan bo`lsangizda hali erishmagan yutuqlarim bor deb ayta olasizmi?
— Maqsadlar ko`p. Jahon chempionatlarida 9 ta uchrashuvni boshqargan bo`lsamda bu natijalarim bilan to`xtab qolmasdan, mundialdagi o`yinlarim sonini 10 ta yoki 11taga ko`paytirishimiz ham mumkin. Bu yaxshi ko`rsatkich bo`lardi. Asosiysi, bugungi kundagi muvaffaqiyatlarimizdan havolanib ketmasligimiz kerak.
— Har bir sportchining o`z kumirlari bo`ladi. Ravshan Ermatovning ham ham kumiri bormi?
— Jamolalar yoki futbolchilardan kumirim yo`q. Chiroyli futbolning muxlisiman. Lekin O`zbekiston milliy terma jamoasiga ishqibozlik qilaman. Ular g`alaba qozonsa, boshim ko`kka etib xursand bo`laman. Hakamlarga kelsak, ilgarilari Perluidji Kollina, Markus Merk, Andrey Fris singari jahon tanigan referilarga havas qilardim. Ayni pallada ular o`z faoliyatini tugatishgan. Hozirgi taniqli hakamlar bilan do`stmiz. Seminarlarda birga bo`lib, fikr almashamiz. Shu bois ularni kumir emas, do`stlarim deb hisoblayman.
— Mashhurlik borasida har qancha maqtansangiz arziydi. Aytingchi, mashhur bo`lganingiz sizga nima berdi?
— To`g`risini aytsam, men o`zimni mashhur inson deb hisoblamgan bo`lardim (kuladi). Bundan ancha yil avvalgi Ravshan Ermatov qanday inson bo`lgan bo`lsa, hozirda ham xuddi shundayman. Hayotimda bo`lgan o`zgarish sifatida vaqt taqchilligini ayta olaman. Avvalari vaqtim biroz ko`p bo`lgan. Ayni damda esa vaqtim kamroq.
— Demak yulduzlik kasaliga chalinmagansiz?
— Yo`q. Bu menga yot tushuncha hisoblanadi. Hamma qatori inson sifatida qabul qilishlarini xohlayman.
— Chindan ham hakamlarning vaqti kam bo`ladi. Ayniqsa, FIFA toifasidagi referilari juda ko`p safarda bo`lishini bilamiz. Oila a`zolaringiz uyda kam bo`lishingnizni qanday qabul qilishadi?
— Ular buni to`g`ri qabul qilishadi, tushunishadi deya olaman. Siz ta`kidlaganingizdek, safarlarda ko`p yurgan paytimizda oila a`zolarimizga, do`stlarimizga vaqt ajratishimiz qiyin kechadi. Biroq vaqt topildi deguncha, oilam bag`rida bo`lishga intilaman. Men o`z ishimga professional tarzda yondoshishimni oila a`zolarim yaxshi tushunishadi va e`tiroz bildirishmaydi.
— Kelajakda Ravshan Ermatov oilasidan unga munosib izdosh etishib chiqishi mumkinmi?
— Bu qiziqishlardan kelib chiqqan holda hal bo`ladi. Farzandlarim qaysi kasbga qiziqishsa, shuni tanlashi kerak deb o`ylayman. Chunki yoqtirmagan sohaga majburlab olib kirib bo`lmaydi. Inson o`zi yoqtirgan holda kasb tanlasa maqsadga muvofiq bo`ladi. Agar farzandlarim hakamlikka qiziqib, uni tanlasa, qo`limdan kelgancha yordam berishga harakat qilaman.
— Ravshan aka, siz dastlab futbol bilan shug`ullgansiz. Keyinchalik jiddiy jarohatdan so`ng to`p tepishni bas qilgan holda, hakamlik kasbini tanlagansiz. Aytingchi, futbolda qolganingizda mana shunday yutuqlarga erisha olarmidinigiz?
— Ochig`i, hakamlik kasbini tanlayman deb sira ham o`ylamagandim. O`zbekiston milliy terma jamoasida to`p surishni va jahon chempionatida vatanim sharafini himoya qilishni xohlardim. Buni qarangki, hakamlikga o`tganimdan so`ng bunday imkoniyat yuzaga keldi. Ishonamanki, futbolchi bo`lganimda ham shunday natijalarga erishgan bo`lardim. Chunki men o`z ishimga doim jiddiy yondoshganman. Bir ishni boshladimmi, unga borimni berishga harakat qilganman. Inson o`z vazifasini fidoiylik bilan bajarmasa, biror nimaga erisha olmaydi. Futbol o`ynagan vaqtimda ham shunday edim...
— Ko`p kuzatganman, har qanday vaziyatda ham bosiqlik bilan qaror chiqarib kelgansiz. Hech qachon futbolchilar bilan jiddiy tortishuvlarga bormagansiz. Maydonda va hayotda fe`l-atvoringiz bir xilmi?
- Chindan ham futbol maydonida futbolchilar juda asabiy bo`lishadi. Hakamlar ham asabiy bo`lsa, bu bahs jiddiy tortishuvlarga sabab bo`lib qolishi hech gapmas. Shu boisdan hakam doimo sovuqqon bo`lishi va har qanday vaziyatda ham o`zini bosishi darkor. Maydondan tashqarida ham doim bosiqlik bilan qaror chiqarishga odatlanganman. Birovga ozor berishni yoki jig`ibiyron bo`lib yurishni istamayman. Hamma ishni samimiylik, xushmuomilalik bilan hal qilishga urinaman. Shu orqali maqsadlarim sari ildamlab boraveraman.
- Suhbat uchun tashakkur. Sizdan yanada ulkan yutuqlarni kutib qolamiz.
- Rahmat.
Izzat Abduvahobov suxbatlashdi
