Agar odamlar ko`rsatmalar va ijtimoiy masofalanishga amal qilmasa, Eronda koronavirusning ikkinchi to`lqini sodir bo`lishi mumkin, degan Eron sog`liqni saqlash vaziri Said Namaki.
O`rta Sharqdagi virus eng ko`p tarqalgan mamlakatlardan biri bo`lgan Eronda karantin choralari apreldan boshlab engillashtirila boshlandi. Ammo, may oyida aprel oyining oxiridagidan ko`ra ko`proq odam koronavirusga chalindi. Hukumat bu holatni koronavirus tekshiruvlari ko`paygani bilan izohlagan.
“Koronavirusning tarqalishi hali to`xtagani yo`q. Virus xohlagan paytda oldingidan ham kuchliroq bo`lib qaytishi mumkin. Agar odamlarimiz qoidalarga rioya qilmasa, biz o`zimizni eng yomon holatga tayyorlashimiz kerak bo`ladi” dedi Said Namaki.
1 iyun holatiga ko`ra, Eronda 154 445 kishi koronavirus bilan kasallandi va 7878 kishi vafot etdi.
Eronda cheklovlar yumshatilishining bir qismi sifatida 30 maydan boshlab masjidlar ochildi va davlat xodimlarining barchasi o`z ish joylariga qaytdilar.
Lekin, hukumat mamlakat janubida joylashgan Huziston va Siston Baluchiston provinsiyalarida kasallanish holatlari ko`paygach mayning o`rtasida cheklovlarni qayta joriy qilishga majbur bo`ldi.
“Virus bilan kurashda hali uzoq yo`lni bosib o`tishimiz kerak. Barcha ko`rsatmalarga amal qilinishi shart” degan Namaki.
