O`zbekiston Respublikasiga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo`yicha Respublika maxsus komissiyasining qaroriga muvofiq joriy yilning 15 iyun kunidan e`tiboran “sariq” va “yashil” toifasiga kiruvchi hududlar o`rtasida mahalliy yo`nalishlarda avtobuslar harakati qayta yo`lga qo`yiladi. Bu haqda Transport vazirligi Matbuot xizmati ma`lum qildi.
Bunda tashuvchilar faoliyati quyidagi talablardan kelib chiqqan holda tashkil etiladi:
* Transport vositasini yakuniy yo`nalish nuqtasida dezinfesiya qilish;
* avtobus saloniga faqatgina tibbiy niqoblardagi yo`lovchilarni kiritish;
* haydovchilarni tibbiy qo`lqop va tibbiy niqoblar bilan ta`minlash hamda ularning muntazam ravishda o`z vaqtida almashtirib borilishi choralarini ko`rishi lozim.
Shu munosabat bilan bugundan avtovokzal va avtostansiyalar ham o`z ish faoliyatini tiklaydi.
Avtovokzal va avtostansiyalar ish faoliyati Karantin davrida mahalliy yo`nalishlarda avtobuslar qatnovlarini yo`lga qo`yishning vaqtinchalik tartibiga muvofiq tashkil etiladi.
