Tahririyatimizga ishlovchi pensionerlardan "Pensionerlar uchun berilgan plastik kartadan mablag`ni bankomat orqali naqdlashtirish xizmati uchun komission to`lovlar belgilanmayotgandi. Ma`lum muddatdan so`ng komission to`lov olib qolina boshlandi. Pensionerlarga bu borada imtiyoz bor emasmidi?" degan mazmunda ko`plab murojaatlar bo`lyapti. Mazkur masalaga oydinlik kiritish maqsadida O`zbekiston Respublikasi Markaziy banki To`lov tizimlari departamentining To`lov infratuzilmalarini rivojlantirish boshqarmasi boshlig`i o`rinbosari Xushvaqt AZIZOV bilan bog`landik...
— Markaziy bank tomonidan FAQATGINA pensionerlar uchun bank kartalaridagi mablag`larni istalgan tijorat bankiga tegishli bankomatlar orqali echishda foiz olinmasligi bo`yicha tijorat banklariga ko`rsatma berilgan. Banklar mustaqil tijorat tashkiloti bo`lib, bankomatlarga naqd pullarni etkazish ham ma`lum bir sarf-xarajatlarni talab etadi.
Ishlovchi pensionerlarga bunday tartib AMAL QILMAYDI. Sababi, ular o`zi ishlab turgan tashkilotidan berilgan bank kartalaridan ham foydalanishadi. Ushbu kartaga ham oylik ish haqi, ham pensiya mablag`lari kirim qilinadi.
Bankomatlarga joylanadigan pul sig`imi cheklanganligi va aholiga bankomatlardagi naqd pullarning uzluksizligini ta`minlash talab etiladi. Ya`ni, ishlovchi pensioner katta miqdordagi naqd pulni echib olishi natijasida boshqa shaxslar yana bankomatni to`ldirib ketishlariga qadar kutib qolishlariga sabab bo`ladi.
— Pensiya puli uchun alohida plastik kartalar tarqatilgan-ku?!
— Ishlovchi pensioner o`z ish haqi tushadigan bank kartasidan pensiya pullarini olish uchun ochilgan kartaga pul o`tkazib echib olishi ehtimoli yuqori-da. Ya`ni, hozirgi kunda kartadan kartaga pul ko`chirish imkoniyati mavjud. Bu holda HUMO to`lov tizimi kartalari bo`yicha kartadan kartaga pul mablag`lari vositachilik to`lovisiz amalga oshirilmoqda. Shu bois adolat mezoni buzilmasligi uchun har qanday ehtimol hisobga olingan.
— Shunday ekan, minimal va maksimal pensiyani hisobga olib, oltin o`rtalikni tanlab, 1 oyda
1 marta belgilangan limit bo`yicha ishlovchi pensionerlarga ham pensiyasini bankomatdan foizsiz echadigan tartib joriy qilsa adolatdan bo`lmaydimi?
— Yo`q, unday cheklov o`rnatish imkoniyati murakkab jarayon hisoblanadi. Zarurat yuzasidan betob bo`lib qolishi yoki favqulodda naqd pul kerak bo`lib qolishi mumkin. Deylik, limitidan foydalanib bo`lgan. Zarur mablag`ni yana qayta olish uchun esa sarson bo`lib qoladi. Bunday amaliyot jahonda yo`q. Bankomat nima uchun kerak? Odamga har qadamda istalgan vaqtda: kechayu-kunduz farqi yo`q, naqd pul kerak bo`lib qolganda joniga oro kirish uchun kerak.
BANK KASSALARI BUNDAN MUSTASNO, Ya`NI...
— Shu o`rinda barcha pensionerlarimizga murojaat qilib shuni aytmoqchimizki, naqd pul echishda bankomatlardan tashqari o`zlariga tegishli bank kassalariga ham murojaat etishlari va foizsiz naqd pul echib olishlari mumkin. Ishlovchi pensionerlar ham bu imkoniyatdan foydalanishi mumkin. O`zlariga yaqin bo`lgan hududdagi bank kassalariga tashrif buyurgan holda bank kartalaridagi mablag`ni naqdlashtirib olish imkoniyatiga egalar.
Shuningdek, bank kartalaridagi mablag`lar orqali respublikamizdagi mavjud barcha savdo va xizmat ko`rsatish punktlarida o`rnatilgan to`lov terminallari orqali to`lovlarni naqd pulsiz amalga oshirish imkoniyati mavjud. Zero O`zbekiston Respublikasining “To`lovlar va to`lov tizimlari to`g`risida”gi qonuni 36-moddasiga asosan tovarlar va xizmatlarni chakana realizasiya qilishni amalga oshiruvchi yakka tartibdagi tadbirkorlar va yuridik shaxslar to`lovlarning bank kartalaridan foydalangan holda qabul qilinishini ta`minlashi shartligi belgilangan.
Shu bilan birga alohida qayd etish joizki, Prezidentimiz rahbarligida 2020 yil 13 mayda o`tkazilgan videoselektor yig`ilishida qabul qilingan qarorga muvofiq, pensionerlarning murojaatlari inobatga olinib Xalq banki tomonidan bundan buyon pensiya va nafaqa to`lovlari karantin qoidalariga amal qilingan holda naqd pulda berilishi ta`minlanadigan bo`ldi.
ESLATMA!
Pensiya va nafaqa bilan bog`liq savollaringiz bo`lsa, kechayu kunduz ishlayotgan 1106 yoki (71) 210-20-02 “Ishonch telefonlari”ga qo`ng`iroq qilishingiz mumkin. Shuningdek, Markaziy bankning barcha hududiy filiallariga ham telefon orqali murojaat qilishingiz mumkin.
DARVOQE...
Tahririyatimiz ham aynan shu mavzu bo`yicha savol va e`tirozlaringizni haftaning dushanbadan jumaga qadar soat 10:00 dan 16:00 gacha (+99895) 194-64-16 telefon raqami va shu raqam orqali telegram manzilda qabul qilinadi.
Sadoqat ALLABERGANOVA
