Bu savol ko`pchilikni qiziqtirsa, “manaman” degan shifokorni esa sergak tortdiradi. Xo`sh, bu o`rinli savollar qaerda kesishadi? Bugun 4 iyul kuni sog`liqni saqlash vaziri Alisher Shodmonov boshchiligidagi OAV vakillari, jurnalist va bloggerlar ishtirok etgan press-turda biz aynan shu savollar kesishgan nuqtada bo`ldik.
2 BARAVARGA “ChO`ZILUVChI” – “ELASTIK” ShIFOXONA
Dushanba 6 iyul kuni foydalanishga topshirilishi kutilayotgan 2000 o`ringa mo`ljallangan, lekin 4 000 o`ringacha transformasiya qilish imkoniyatiga ega bo`lgan “cho`ziluvchan” ko`p tarmoqli yuqumli kasalliklar maxsus shifoxonasi Toshkent viloyatining Zangiota tumanida barpo etilmoqda. Loyihaning umumiy qiymati 504 milliard so`m bo`lib, 33 gektarda 2 ta kompleks qurilmoqda. Mazkur shifoxona murakkab epidemiologik vaziyatda yuqumli kasalliklar xususiyatidan kelib chiqqan holda, barcha sanitariya-epidemologik talablarga javob beruvchi maxsus muassasa bo`lib xizmat qiladi.
“NIMA UChUN ShIFOXONLARDA ShIFOKORLAR KORONAVIRUS YuQTIRIB OLIShMOQDA?”
“Koronavirusga chalingan bemorni tishi og`rib qolsa yoki boshqa yondosh kasallik bezovta qilsa, unga tashxis qo`yish va davolash uchun ushbu shifoxonada barcha sharoit yaratilgan. Stasionar joylarning hammasi bokslangan, har bir xona avtonom. Biridagi havo boshqasiga o`tmaydi. Ularga kirib-chiqish ham, xizmat ko`rsatish ham alohida. Kasallar kelgach, qabul bo`limidan tambur orqali to`g`ridan-to`g`ri o`z palatasiga joylashtiriladi. Shifokorlar harakatlanish chog`ida sanitar o`tkazgichlar orqali o`tadi. Bu barchaning – tashxisi noaniq bo`lganlar, vrachlar va boshqa xizmatchilarning xavfsizligini ta`minlash imkonini beradi. Jarrohlik zallariga havo tepadan beriladi va yon tomonlardan so`riladi. Natijada doimiy sterillik ta`minlanadi. Nima uchun shifoxonlarda shifokorlar koronavirus yuqtirib olishmoqda? Buning sababi ham turli tipdagi ixtisoslashmagan kasalxonalarning koronavirus bemorlari uchun ajratilgani va kasalxonalardagi sharoitlar virusga qarshi kurashishga moslashmagani bo`lmoqda. Ushbu biz turgan shifoxona esa barcha yuqori texnologiyalar asosida jihozlanib, bu erda virus tarqalishiga yo`l qo`yilmaydi”, - deydi sog`liqni saqlash vaziri Alisher Shodmonov.
Laboratoriyada virusologiya, biokimyo va immunologiya, mikrobiologiya, parazitologiya bo`yicha eng ilg`or apparatlar o`rnatilgan. Masalan, amaldagi polimer zanjirli reaksiya uskunasi 5 soatda o`rtacha 40 kishiga tashxis qo`ysa, bu erdagi zamonaviy jihozlar 2 soatda 90 ta namunani aniqlash imkoniyatiga ega. Ko`rpa-to`shak va matolar yuvilib, boshqa buyumlar bug` yordamida dezinfeksiya qilinadi.
72 o`rinli reanimasiya bo`limida har bir koyka o`pkaning sun`iy ventilyasiyasi va davolash apparatlari bilan jihozlangan. Bu bo`limni kardiologiya, nevrologiya, pediatriya kabi turli yo`nalishlar bo`yicha jihozlash ham mumkin. Bo`limda bemorlarga ko`rsatilayotgan xizmat sifatini baholash shaffof bo`lishi uchun bo`lim va korridor shaffof oyna bilan ajratilgan.
FAQAT TOShKENTDA EMAS...
SSV ma`lumotiga ko`ra, bu turdagi shifoxona faqatgina Toshkent viloyatida emas, turli viloyatlarda ham qurilib, foydalanishga topshirilmoqda. Ular:
- Namangan viloyati Pop tumani G`urumsaroy MFY hududida 150 o`rinli maxsus shifoxona hamda 1200 o`rinli maxsus karantin hududi;
- Surxondaryo viloyati Termiz tumani Qoraxon mahallasi hududida
100 o`rinli maxsus shifoxona hamda 1000 o`rinli maxsus karantin hududi;
- Qoraqalpog`iston Respublikasi Nukus shahri "Kos kul" qishlog`i Nukus garnizonining 1-sonli harbiy shaharchasi “Shimoliy-G`arbiy” harbiy okrugi hududida 100 o`rinli maxsus shifoxona hamda 1000 o`rinli maxsus karantin hududi;
- Samarqand viloyati Samarqand shahri “Vatanparvar” mahallasi harbiy qismi hududida 100 o`rinli maxsus shifoxona hamda Samarqand shahri
37-sonli xarbiy qism hududida1000 o`rinli maxsus karantin hududi;
- Navoiy viloyati Zarafshon shahri hududida “648 o`rinli maxsus karantin”ob`ektidir.
Sardorbek Rahmonqulov
