Бу савол кўпчиликни қизиқтирса, “манаман” деган шифокорни эса сергак тортдиради. Хўш, бу ўринли саволлар қаерда кесишади? Бугун 4 июль куни соғлиқни сақлаш вазири Алишер Шодмонов бошчилигидаги ОАВ вакиллари, журналист ва блоггерлар иштирок этган пресс-турда биз айнан шу саволлар кесишган нуқтада бўлдик.
2 БАРАВАРГА “ЧЎЗИЛУВЧИ” – “ЭЛАСТИК” ШИФОХОНА
Душанба 6 июль куни фойдаланишга топширилиши кутилаётган 2000 ўринга мўлжалланган, лекин 4 000 ўрингача трансформация қилиш имкониятига эга бўлган “чўзилувчан” кўп тармоқли юқумли касалликлар махсус шифохонаси Тошкент вилоятининг Зангиота туманида барпо этилмоқда. Лойиҳанинг умумий қиймати 504 миллиард сўм бўлиб, 33 гектарда 2 та комплекс қурилмоқда. Мазкур шифохона мураккаб эпидемиологик вазиятда юқумли касалликлар хусусиятидан келиб чиққан ҳолда, барча санитария-эпидемологик талабларга жавоб берувчи махсус муассаса бўлиб хизмат қилади.
“НИМА УЧУН ШИФОХОНЛАРДА ШИФОКОРЛАР КОРОНАВИРУС ЮҚТИРИБ ОЛИШМОҚДА?”
“Коронавирусга чалинган беморни тиши оғриб қолса ёки бошқа ёндош касаллик безовта қилса, унга ташхис қўйиш ва даволаш учун ушбу шифохонада барча шароит яратилган. Стационар жойларнинг ҳаммаси боксланган, ҳар бир хона автоном. Биридаги ҳаво бошқасига ўтмайди. Уларга кириб-чиқиш ҳам, хизмат кўрсатиш ҳам алоҳида. Касаллар келгач, қабул бўлимидан тамбур орқали тўғридан-тўғри ўз палатасига жойлаштирилади. Шифокорлар ҳаракатланиш чоғида санитар ўтказгичлар орқали ўтади. Бу барчанинг – ташхиси ноаниқ бўлганлар, врачлар ва бошқа хизматчиларнинг хавфсизлигини таъминлаш имконини беради. Жарроҳлик залларига ҳаво тепадан берилади ва ён томонлардан сўрилади. Натижада доимий стериллик таъминланади. Нима учун шифохонларда шифокорлар коронавирус юқтириб олишмоқда? Бунинг сабаби ҳам турли типдаги ихтисослашмаган касалхоналарнинг коронавирус беморлари учун ажратилгани ва касалхоналардаги шароитлар вирусга қарши курашишга мослашмагани бўлмоқда. Ушбу биз турган шифохона эса барча юқори технологиялар асосида жиҳозланиб, бу ерда вирус тарқалишига йўл қўйилмайди”, - дейди соғлиқни сақлаш вазири Алишер Шодмонов.
Лабораторияда вирусология, биокимё ва иммунология, микробиология, паразитология бўйича энг илғор аппаратлар ўрнатилган. Масалан, амалдаги полимер занжирли реакция ускунаси 5 соатда ўртача 40 кишига ташхис қўйса, бу ердаги замонавий жиҳозлар 2 соатда 90 та намунани аниқлаш имкониятига эга. Кўрпа-тўшак ва матолар ювилиб, бошқа буюмлар буғ ёрдамида дезинфекция қилинади.
72 ўринли реанимация бўлимида ҳар бир койка ўпканинг сунъий вентиляцияси ва даволаш аппаратлари билан жиҳозланган. Бу бўлимни кардиология, неврология, педиатрия каби турли йўналишлар бўйича жиҳозлаш ҳам мумкин. Бўлимда беморларга кўрсатилаётган хизмат сифатини баҳолаш шаффоф бўлиши учун бўлим ва корридор шаффоф ойна билан ажратилган.
ФАҚАТ ТОШКЕНТДА ЭМАС...
ССВ маълумотига кўра, бу турдаги шифохона фақатгина Тошкент вилоятида эмас, турли вилоятларда ҳам қурилиб, фойдаланишга топширилмоқда. Улар:
- Наманган вилояти Поп тумани Ғурумсарой МФЙ ҳудудида 150 ўринли махсус шифохона ҳамда 1200 ўринли махсус карантин ҳудуди;
- Сурхондарё вилояти Термиз тумани Қорахон маҳалласи ҳудудида 100 ўринли махсус шифохона ҳамда 1000 ўринли махсус карантин ҳудуди;
- Қорақалпоғистон Республикаси Нукус шаҳри "Кос кул" қишлоғи Нукус гарнизонининг 1-сонли ҳарбий шаҳарчаси “Шимолий-Ғарбий” ҳарбий округи ҳудудида 100 ўринли махсус шифохона ҳамда 1000 ўринли махсус карантин ҳудуди;
- Самарқанд вилояти Самарқанд шаҳри “Ватанпарвар” маҳалласи ҳарбий қисми ҳудудида 100 ўринли махсус шифохона ҳамда Самарқанд шаҳри 37-сонли харбий қисм ҳудудида1000 ўринли махсус карантин ҳудуди;
- Навоий вилояти Зарафшон шаҳри ҳудудида “648 ўринли махсус карантин”объектидир.
Чақалоқлар инкубатори
Чақалоқ тарозиси
Сардорбек Раҳмонқулов
