2020 yil 29 iyul kuni Odam savdosi va majburiy mehnatga qarshi kurashish milliy komissiyasi, Bosh prokuratura Akademiyasi, Inson huquqlari bo`yicha Milliy markazi, Evropada xavfsizlik va hamkorlik tashkilotining O`zbekistondagi loyihalari koordinatori hamda BMTning Giyohvandlik va jinoyatchilik bo`yicha boshqarmasi bilan hamkorlikda Odam savdosiga qarshi kurashish umumjahon kuniga bag`ishlab, “COVID-19 pandemiyasi sharoitida Odam savdosiga qarshi kurashish” mavzusida videokonferensaloqa shaklida xalqaro davra suhbati o`tkazildi. Bu haqda Senat Matbuot xizmati xabar bermoqda.
Unda 50 dan ortiq davlat idoralari va nodavlat notijorat tashkilotlari, shuningdek xalqaro tashkilotlarning odam savdosi va majburiy mehnatga qarshi kurashish bo`yicha mutaxassislar va ekspertlar ishtirok etdi.
O`zbekiston Respublikasi Oliy Majlisi Senati Raisi, Odam savdosiga va majburiy mehnatga qarshi kurashish Milliy komissiyasi raisi T.Narbaeva o`z kirish so`zida mamlakatimizda odam savdosiga va majburiy mehnatga qarshi kurashish borasida amalga oshirilayotgan ishlar, mavjud muammo va istiqboldagi vazifalarga e`tibor qaratdi.
Ta`kidlanganidek, butun dunyoda 30 iyul – Odam savdosiga qarshi kurashish kuni sifatida keng nishonlanadi. O`tgan yili ushbu sana munosabati bilan Prezidentimizning tegishli Farmoniga binoan Odam savdosiga va majburiy mehnatga qarshi kurashish Milliy komissiyasi, mazkur masala bo`yicha Milliy ma`ruzachi instituti joriy qilingan edi.
O`tgan bir yil mobaynida Milliy komissiya tomonidan mamlakatimizda odam savdosiga va majburiy mehnatga qarshi kurashish borasida qator ijobiy ishlar amalga oshirildi. Xususan, milliy qonunchiligimizni takomillashtirish, ushbu sohada davlat organlari faoliyati samaradorligini oshirish, O`zbekistonning xalqaro reytinglardagi pozisiyasini yaxshilash borasida bir qator me`yoriy-huquqiy hujjatlar, chora-tadbirlar dasturi, “Yo`l xaritalari” qabul qilinib, ijrosi ta`minlanib kelinmoqda.
Shu bilan birga, bu boradagi ishlar yaqinda AQSh Davlat departamenti tomonidan e`lon qilingan Jahondagi odam savdosi to`g`risidagi yillik ma`ruzada ham e`tirof etildi. Davlat departamenti rahbari o`z ma`ruzasida O`zbekistonning olib borayotgan chora-tadbirlariga alohida to`xtalib o`tdi. Jumladan, O`zbekistonning bu muammoni hal qilishga qaratilgan katta sa`y-harakatlari mintaqada boshqa mamlakatlar uchun yangi standartni belgilab berayotganligini ta`kidladi.
Bundan tashqari, davra suhbatida odam savdosiga va majburiy mehnatga qarshi kurashish borasida milliy qonunchiligimizni xalqaro standartlardan kelib chiqqan holda takomillashtirish ishlarini davom ettirish, odam savdosi qurbonlarini identifikasiya qilish milliy mexanizimini ishlab chiqish, bu turdagi jinoyatlar uchun jazo muqarrarligini ta`minlash, soha mutaxassislarining malakasini oshirish masalalariga urg`u berildi.
Shuningdek, davra suhbatida COVID-19 pandemiyasining natijalarini va odam savdosining yangi turlari paydo bo`lishini o`rganish, huquqni muhofaza qilish organlari va boshqa tegishli muassasa xodimlari uchun mo`ljallangan odam savdosiga qarshi kurashish sohasidagi o`quv dasturlarini yanada takomillashtirish bo`yicha olib borilgan tadqiqotning ilk natijalari va tavsiyalari, odam savdosidan jabr ko`rganlarga milliy darajada reabilitasiya xizmatlarini ko`rsatishni tashkil etishga oid masalalar muhokama qilindi.
O`zbekiston Respublikasining diplomatik vakolatxonalari va konsullik muassasalari tomonidan odam savdosidan jabrlanganlarga amaliy yordam ko`rsatish, bu borada xalqaro tashkilotlar bilan hamkorlikni yanada kengaytirishda o`zaro tajriba va fikr almashish muhimligi qayd etildi.
Tadbirda so`zga chiqqan xalqaro tashkilotlar vakillari hozirgi pandemiya davrida mazkur muammoga qarshi kurashda birlashish kerakligi va bu shaxs, jamiyat va xavfsizlik uchun juda muhimligini ta`kidladi.
Shuningdek, odam savdosiga qarshi kurashish sohasida erishilgan yutuqlar, mavjud muammolar, bu borada davlat organlari va fuqarolik jamiyati institutlari o`rtasida o`zaro hamkorlik masalalari belgilab olindi.
