Таҳририятга Қашқадарё вилоятида яшовчи фуқародан мурожаат келиб тушди:
— Хотиним билан бирга яшамаётганимизга бир йилдан ошди. Ажрашиш учун ариза берсам, қанча давлат божи тўлайман? Агар суд аризамни рад этса, қайтадан ариза беришда ҳам давлат божи тўланадими?
Фуқаронинг мурожаатига жавоб олиш мақсадида Фуқаролик ишлари бўйича Яккасарой туманлараро судининг раис ўринбосари Анвар ЁРИЕВ билан боғландик...
— “Давлат божи тўғрисида”ги Ўзбекистон Республикаси Қонуни билан тасдиқланган Давлат божи ставкаларига мувофиқ никоҳни бекор қилиш ҳақидаги даъво аризаларидан базавий ҳисоблаш миқдорининг икки бараварида давлат божи ундирилиши белгиланган. Ҳозирги кунда базавий ҳисоблаш миқдори 245.000 сўм этиб белгиланган.
Оила кодексининг 41-моддасига асосан агар суд эр ва хотиннинг бундан буён биргаликда яшашига ва оилани сақлаб қолишга имконият йўқ деб топса, уларни никоҳдан ажратади.
Сизнинг даъво аризангизни кўриб чиқиш давомида суд ишнинг барча ҳолатларини тўлиқ, ҳар томонлама ва холисона аниқлайди, тарафларнинг ҳуқуқ ва мажбуриятлари тўлиқ таъминлайди, шунингдек, суд процессининг тарбиявий таъсирини ҳам инобатга олиб ҳал қилув қарори қабул қилади.
Ишни кўриб чиқиш давомида Суд оилани сақлаб қолиш имкони бор деган хулосага келса, даъво аризасини қаноатлантиришни рад этиши, акс ҳолатда талабларни қаноатлантириб, никоҳни бекор қилиши мумкин.
Суднинг қарори билан Сизнинг даъво аризангизни қаноатлантириш рад этилган тақдирда Сиз умумий қоидага кўра, ҳал қилув қарори қонуний кучга кирган кундан бошлаб, камида олти ой ўтгандан сўнг даъво аризаси билан янгидан мурожаат қилишингиз мумкин.
Ушбу ҳолатда Сиз никоҳдан ажралиш ҳақидаги даъво аризаси билан умумий асосларга кўра базавий ҳисоблаш миқдорининг икки бараварида давлат божи тўлаган ҳолда судга мурожаат қилишингиз мумкин бўлади.
Дилдора НАЗАРОВА
