«Кўчага ясаниб чиққанингда ортингдан мингта эркак қайрилиб қараса хурсанд бўлма, сенга ҳасад кўзи билан қараётган биргина аёлни кўрсанг, қувонишинг мумкин. Демак, сен бугун жуда гўзалсан!» Номаълум муаллиф
Биз ҳаммадан гўзал, чиройли ва бетакрор бўлишни истаймиз. Бунинг учун кўзгу қаршисида соатлаб вақтимизни ўтказамиз, ноқулай бўлса-да, тор кўйлак ва баланд пошнали туфли киямиз. Аммо дид-фаросат бўлмаса, бу ҳаракатларнинг барчаси бесамар кетади. Хўш, дидимиз қай даражада?! Қуйидаги тест буни аниқлаб беради!
1. Либос сотиб олишда сиз учун муҳим бўлган асосий талаб қайси?
А. «Албатта, нархи. Арзон бўлса, яхши-да!»
Б. «Сифатига аҳамият бераман».
В. «Мен бренд либосларни кийишга одатланганман. Шунинг учун ишлаб чиқарган корхонаси билан қизиқаман».
2. Эгнингиздаги либосни танқид қилишди дейлик, сизнинг ҳаракатингиз...
А. «Менинг кийимим билан одамларнинг нима иши бор?! Боримни кияман-да! Ахир мен уларнинг либосига умуман қарамайман-ку?!»
Б. «Танқид ким томонидан айтилганига эътибор бераман. Балки бежизга гапиришмагандир...»
В. «Мени ҳеч ким танқид қилмайди, бунга ишонаман!»
3. Имиджингизни тубдан ўзгартириш қўлингиздан келадими?
А. «Бундан ҳам муҳимроқ муаммолар бор, шекилли...»
Б. «Қизиқишим устунлик қилиб бу ишга қўл уришим мумкин».
В. «Вой, унда шунча бир-биридан чиройли кийимларим нима бўлади?»
4. Кўчага чиқишдан аввал кийимларингизни қачон тайёрлайсиз?
А. «Эрталаб жавондан бирорта либосни олиб киявераман».
Б. «Уйқуга ётишдан аввал эртага қайси кийимни кийишимни режалаштираман».
В. «Кечки овқатдан сўнг эртанги либосимни кийиб кўриб, унга қўшимча аксессуарларни ҳам тайёрлайман».
5. Бугун кийган либосингизни эртага ҳам кия оласизми?
А. «Эртага ҳам, индинга ҳам киявераман, бунинг нимаси ёмон?»
Б. «Йўқ, имкон қадар бу ишни қилмасликка ҳаракат қиламан».
В. «Бугун кийган либосимни энди камида бир ҳафта киймаслигим аниқ!»
6. Сизга яқин бўлган либос тўпламини танланг.
А. «Футболка, жинси шим, спорт пойабзали ва катта сумка».
Б. «Кардиган, кофта, қулай шим, паст пошнали туфли ва ўртача катталикдаги сумка».
В. «Ёқали кофта, қаламча шаклидаги юбка, баланд пошнали туфли ва чарм сумка».
7. Пардоз санъатини тўлиқ эгаллаганман деб ҳисоблайсизми?
А. «Пудра ва помада суртишни санъат дейсизми?»
Б. «Мода журналлари ҳамда ўзимга ёққан машҳур аёлларнинг суратларига қараб, пардоз қилишни ўзим ўрганганман».
В. «Соч турмаклаш ва пардоз бўйича ўзим учун машҳулотларга қатнаганман».
8. Қайси турдаги пойабзал сиз учун энг маъқули?
А. «Фақат пошнаси паст бўлса бўлди».
Б. «Аниқ бирини айтолмайман, қулай бўлгани яхши».
В. «Яшасин баланд пошнали туфлилар!»
9. Бошдан-оёқ қип-қизил рангда кийиниб олган аёл рўпарангизда ўтиб кетди. Сиз нима ҳақида ўйладингиз?
А. «Ярашибди, қандини урсин!»
Б. «Меъёрдан озгина оширвормаганми?!»
В. «Шу қадар ҳам дидсиз бўладими аёл киши?!»
10. Тикувчига буюртма асосида либос тиктириш...
А. «Азобнинг ўзгинаси! Ундан кўра бозорга тушиб, тайёр кийим олиб чиққан яхши эмасми?»
Б. «Ўзингга ўзинг дизайнерлик қилиш имкониятини берадиган жараён».
В. «Жуда зўр! Кимдир меникидек либос киймаганмикан, деган ўй сизни аниқ безовта қилмайди. Тиктирилган либос фақат сиздагина бўлади!»
11. Сизнингча, бетакрор кўриниш учун нима қилиш лозим?
А. «Сочларни икки кунда бир ювиш ва ораста кийиниш».
Б. «Аввало инсон ўзлигини йўқотмаслиги лозим».
В. «Ёрқин пардоз ва чиройли либос ҳар қайси аёлни ҳам бетакрор кўринишга келтира олади».
12. Уйда қандай кўринишда юрасиз?
А. «Кўчага кийиб бўлмай қолган либосларимни кийиб юраман».
Б. «Қулай либосни кийиб оламан, лекин пардоз қилишни унутмайман».
В. «Уйда ҳам чиройли кўринишда бўлишга ҳаракат қиламан. Мунтазам уй учун алоҳида либослар харид қиламан».
Йўриқнома
Ўзингизга маъқул келган жавобларни белгилаб олгач, баллингизни ҳисоблаб чиқинг. Бунинг учун ҳар бир «А» жавоби учун 1, «Б» жавоби учун 2, «В» жавоби учун эса 3 баллдан қўшинг. Баллингиз миқдорини аниқлаб бўлдингизми? Марҳамат, энди сизга берилган таъриф билан танишинг!
Тест натижаси:
12 баллдан 19 баллгача
Жудаям соддасиз. Либосни шунчаки инсон танасини беркитиб турувчи восита дея санайсиз. У аёлга кўрк бағишлаши ҳақида ўйлашни ҳам истамайсиз. Сизнинг назарингизда, гўзаллик салонлари, кийим-кечак дўконлари ҳашамни хуш кўрувчиларнинг макони. Ҳаётда мураккаб масалалар қалашиб ётганда одамларнинг юрагига ясан-тусан қандай сиҳишига ақлингиз лол. Аммо кишининг либоси у ҳақида илк таассуротни беришини унутиб қўйманг. Қалби гўзал инсоннинг ташқи кўриниши ҳам худди шундай бўлиши лозим!
20 баллдан 29 баллгача
Борига шукр қиладиган аёлсиз. Дид-фаросатингизга ҳавас қилса арзийди, ҳар бир нарсада меъёрга амал қиласиз. Ҳар бир аёл сингари янги либосингиз бўлишини истайсиз, аммо мавжуд кийимларингизни ҳам яраштириб кийиб юриш қўлингиздан келади. Аввало, орасталикка эътибор қаратишингиз таҳсинга сазовор. Баъзи-баъзида ўзингизни эркалатиб туришни маслаҳат берамиз.
30 баллдан юқори
Кийиниш ва пардоз-андоз борасида замондан ортда қолишни истамайсиз. Мода оламини мунтазам кузатасиз. Унинг қонун-қоидаларига асосан кийинасиз. Ҳар бир мавсумни дўконга бориш билан бошлайсиз. Жавонингиз тўла бўлса ҳам, эгнингизга кийишга кийим тополмаган вақтларингиз кўп бўлади. Сизнинг юриш-туришингизга кўпчилик ҳавас билан қарайди. Аммо бундан ўзингиз завқ оляпсизми? Ҳаддан ошириб юбормадингизмикан? Қимматбаҳо либослар аёлнинг диди юқори эканлигидан далолат бермайди. Шу ҳақида ўйлаб кўринг.
Дилноза МИРТОЛИПОВА тайёрлади.
