Ўзбекистонлик боксчи Шаҳрам Ғиёсов ва англиялик Жек Каттералл ўртасида Мисрда бўлиб ўтган WBA Regular камари учун жангдан кейин спортчиларнинг гонорарлари маълум бўлди. Бу ҳақда “SportySalary” нашри хабар берди.
Манбага кўра, Шаҳрам Ғиёсов ушбу жанг учун тахминан 150 минг доллар миқдорида даромад олган. Нашр бу сумма боксчининг Окампо, Урванов ва Паррага қарши аввалги жангларидаги гонорарлари асосида ҳисобланганини қайд этган.
Жек Каттералл эса мазкур жангдан кўпроқ маблағ ишлаган. Унинг гонорари тахминан 250 мингдан 300 минг долларгача баҳоланмоқда.
Маълумот учун, WBA Regular камари учун жанг 23 май куни Мисрда бўлиб ўтди ва 12 раунд давом этди. Унда Шаҳрам Ғиёсов очколар ҳисобига кўра Жек Каттераллга мағлуб бўлди.
Бу мағлубият Ғиёсовнинг профессионал фаолиятидаги илк йўқотиши бўлди. У бунга қадар ўтказган 17 та жангининг барчасида ғалаба қозонган эди.
Мазкур ғалаба ортидан Жек Каттералл ярим ўрта вазн тоифасида WBA Regular камари соҳиби бўлди.
